Quarta, Novembro 25, 2020
Total visitors: 536834

Presidente Camara Comercio Industria Timor-Leste (CCI-TL), emprezario Oscar Lima deklara emprezario nasional sira seidauk prontu intermus kapasidade teknika no finanseiru atu kompete ho emprezario ida husi kualker nasaun membru ASEAN nian, maibe maske nune’e apoia politika governu nian atu halo adesaun ba ASEAN.

Presidente Camara Comercio Industria Timor-Leste (CCI-TL), emprezario Oscar Lima deklara emprezario nasional sira seidauk prontu intermus kapasidade teknika no finanseiru atu kompete ho emprezario ida husi kualker nasaun membru ASEAN nian.

Nia salienta, empreza nasional sira sei presiza apoia husi governu no parte hotu atu eleva kapasidade teknika jestaun no finanseiru atu bele halo diversifikasaun ba atividade empreza nian hodi fo oportunidade servisu ba ema barak, nune’e haburas ekonomia rai laran.

“Koalia hanesan individu, hau hateten tau tan empreza 10 hamutuk ho hau mos ami seidauk bele kompete ho empreza ida husi ASEAN, maibe politikamente ami fo apoia tanba politika tenke halai ba ne’eba. Ami nia kapasidade atu jere finanseira, teknikamente ami seidauk bele to’o ho ema sira ne’ebe mai husi nasaun membru ASEAN,” nia hateten bainhira hola parte iha audensia publika ho komisaun parlamentu nasional kona ba proposta orsamentu geral estado tinan 2020, iha plenaria parlamentu nasional, Dili.

Nia dehan, CCI-TL ho apoia husi banku sira servisu hamutuk ho Instituto Apoia Dezenvolvimentu Empresarial (IADE) kontinua fo formasaun no kapasitasaun ba emprezario sira atu hakbi’it sira nia abilidade halo jestaun ne’ebe diak no sustentavel ba empreza.

Nia hatutan, hahu tinan 2017, mosu problema empase politika hodi implika laiha orsamentu jeral do estado no iha inisio 2020, mosu surtu mundial COVID-19 halo empreza barak mak halo despedimentu ba trabalhadore sira no taka atividade tanba laiha rendimentu.

Nia haktuir, CCI-TL kontinua halo advokasia ba banku sira atu hare fila fali jurus ne’ebe fo ba emprezario sira no ba governu atu kria lei no politika ne’ebe diak hodi fo oportunidade ba empreza nasional sira no haforsa haforsa sira atu halo diversifikasaun ba setor produtivu sira.

Iha parte seluk, Membru Parlamentu Nasional, Deputado Adriano do Nascimento hateten setor privado nasional lao hakdasak hela tanba setor privado internasional mak domina ekonomia rai laran.

Nia dehan, governu tenke iha politika no estratejia ne’ebe diak atu bele iha balansu entre setor privado nasional no setor privado internasional tanba ho ida ne’e mak setor privado nasional bele forte hodi dezenvolve ekonomia rai laran no halo pagamentu ba kapital ne’ebe empreza nasional sira foti hodi implementa projetu governu nian tanba empreza barak governu seidauk seluk.

“Timor-Leste iha potensialidade ekonomia. Oinsa governu no CCI-TL atu halo mapamentu ekonomia ida, liu-liu area potensial no iha munisipio ne’ebe atu bele dezenvolve ekonomia ne’ebe sustentavel ba nasaun ida ne’e,” nia hateten.

Nia preokupa ho politika governu nian ne’ebe iha tendensia bo’ot hamosu politika subsidio, ne’ebe sustentabilidade laiha ba dezenvolvimentu ekonomiku.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04