- Publika iha: 23 Janeiro 2017
Dadus hatudu 20% husi kompania ne’ebe produs bee mineral iha rai laran la tuir standarte international husi Organizasaun Mundial Saude (OMS) nian.
Diretor Servisu Toxicologia Analise Bee no Ambiental iha Laboratorium Nasional, Pedro Almeida da Silva hateten total kompania ne’ebe halo produsaun bee mineral iha rai laran hamutuk 70. Husi 70 ne’e iha 80% mak sira nia produsaun iha kualidade.
Nia hateten, numeru pursentu ne’e bazeia ba dadus teste bee mineral ne’ebe sira halo durante ne’e, tanba kada fulan kompania sira aprezenta sampel hodi halo teste.
“Iha kontaminasaun ho bakteria tanba masa (gallon) fase la moos, aimoruk no mineral ne’ebe sira uza la tuir dosis lolos, entaun bee ne’e moruk no iis,” nia hateten, iha nia knar fatin Bidau, Dili.
Alende ne’e nia mos preokupa ho konesementu husi konsumedores ba produtus iha rai laran ne’ebe sei menus tebes.
Tanba ne’e, nia husu ba konsumedores atu hili produtus bee moos ne’ebe diak, tanba bee ne’ebe laiha kualidade bele fo impaktu ba saude liu –liu moras diarea.
Foin lalais iha akontesementu ida iha Ministerio do Petroleo no Rekursu Minerais, nia hateten funsionario sira kestiona produtus bee moos sira iha rai laran, tanba bainhira konsumu halo ema kabun moras.
Depois hetan informasaun, ekipa laboratorium tuun foti sampel hodi halo teste no identifika katak bee ne’e iha duni bakteria ne’ebe halo ema moras.
Entaun ho ida ne’e, kompania ne’ebe produs bee ne’e hadia fali sira nia kualidade da produsaun e ikus mai halo teste fali, rezultadu pozitivu, laiha problema ona.
Nia hateten, problema hirak ne’e mosu tanba servisu nain sira iha fabrika bee ne’e menus konesementu.
Entretantu Membru Parlamentu (MP), Leonel Marçal hateten agora dadaun kuaze ema hotu la konsumu ona bee natural (bee matan), maioria konsumu bee mineral sira inklui bee gallon.
Nia dehan, governu iha obrigasaun atu kontrola produtu sira ne’e, pendente provizoriamente atu kompania bele hadia kualidade produtu ne’ebe iha.
“Ita haree katak kuaze ema iha teritorio tomak liu –liu iha Dili, la konsumu ona bee natural husi bee matan, maibe ema hotu konsumu bee ne’ebe mai husi fabrika, konserteza uza aimoruk kimiku entaun ita la kontrola diak mak sei afeta ba ema nia vida,” nia hateten.
Nia hateten, lei protesaun konsumedores iha ona tanba ne’e konsumedores tenke halo reklamasaun bainhira produtu ne’ebe sosa laiha kualidade.
“Sira la kumpri, tenke taka, nune’e labele fo moras no mate ba ema seluk,” nia hateten.
Nia mos husu orgaun kompetente sira atu prosesa empreza sira ne’ebe fa’an aihan kontaminadu no laiha kualidade, ida ne’e krime no afeta ema nia vida.