Mane Ida Hetan Pena Prizaun Tinan 3 Tanba Na’ok

Arguido  baku vitima nia ulun ho ai dona to’o ran hafoin na’ok vitima nia sasan iha kuartu laran, no tribunal fo pena ba arguido prizaun tinan tolu no suspende ba tinan lima ba hahalok ida ne’e.

Tuir akuzasaun Ministeiru Publiku ne’ebe lee sai husi juis prezidente katak, loron 4/12/2012 iha area Colmera, wainhira vitima ba servisu hela, arguido ne’ebe sei iha relasaun familia ho vitima ba visita vitima nia uma, tanba arguido sente matan dukur  entaun vitima nia fen haruka arguido ba toma iha kuartu.

Entaun arguido mos tama ba kuartu hodi toba, maibe to’o iha kuartu laran arguido komesa foti vitima nia pasta metan, telephone, kalsa badak, kamizola metan ida, no ho osan balun.

Hafoin foti sasan hirak ne’e, arguido sai mai sein hasee vitima nia fen,no bainhira iha dalan arguido konsege hasoru malu ho vitima no nia konese pasta ne’ebe arguido uza ne’e, entaun vitima husu maibe arguido halai no vitima duni tuir.

Vitima no arguido duni malu no wainhira vitima hahu besik ona ho arguido, arguido foti aidona ida hodi hurlele vitima nia ulun to’o ran.

Hafoin rona tiha akuzasaun hirak ne’e, juis prezidente husu ba arguido atu koalia maibe iha altura ne’eba arguido lakohi koalia.

Tanba arguido hili nonok, entaun juis prezidente deside tama kedas ba iha alegasaun Ministeriu Publiku. Iha alegasaun ne’e Ministeriu Publiku husu ba tribunal atu fo pena prizaun tinan rua, tanba hahalok ne’ebe arguido komete iha krimi violensia apòs subtrasaun (na’ok sasan no baku tan ema).

Enkuantu iha parte defesa arguido nian husu ba tribunal atu fo pena ne’ebe adekuadu, tanba arguido rekonese hahalok ne’ebe nia halo no promote atu la komete tan aktu hanesan iha future.

Entaun juis prezidente deside no fo pena prizaun tinan tolu no suspende ba tinan lima.