- Publika iha: 18 Maio 2016
Segundu Komandante Polisia Munisipiu Dili, Superintendente Asistente Euclides Belo, hateten Polisia Tranzito munisipiu Dili, konsege prende motorizadas hamutuk 384 tanba viola regras tranzito nian.
Regras tranzitu ne’ebe sira viola mak, nia dehan, hanesan laiha karta kondusaun, laiha espelhu (kada spion), uza knal pot resin inklui laiha sapa matrikula.
“Ami prende tanba regras barak mak sira viola, motor sira nebe ami konsege prende hamutuk 384 resin hanesan ne’e,” Segundu Komandante Belo hateten, iha Dili.
Alende ne’e, nia dehan, Polisia Tranzito Munisipiu Dili mos konsege prende kareta estadu hamutuk 8 ne’ebe viola regras, hanesan uza vidru metan no uza kareta estadu ba interese privadu nian.
“Sira uza vidru metan, tula familia ba rekreasi,” nia dehan.
Nia dehan, objetivu husi prende viaturas hirak ne’e atu evita asidente trafiku ne’ebe kada tinan sempre aas.
Tanba ne’e, nia husu, ba publiku tomak atu kumpri no respeita regras tanzito ne’ebe estadu trasa ona, nune’e bele asegura seguransa pesoal.
Kona ba motoristas ne’ebe laiha karta kondusaun, nia dehan, sei kumpri 72 oras iha sela no balun ne’ebe uza knal pot resin tenke troka, no laiha sapa matrikula tenke selu multa inklui laiha espelhu.
“Sira selu multa no troka knal pot sira ne’e , bele foti hikas sira nia motor,” nia hateten.
Iha parte seluk Membru Parlamentu, Deputadu Cesar Valente, aseita ho atuasaun PNTL ne’e hodi eduka sidadaun hotu ne’ebe mak iha viaturas tenke kumpri regras.
“Prende hanesan ne’e hodi sira bele kumpri regras no hatene regras,” nia dehan.
Kona ba kareta estadu ne’ebe utuliza la tuir nia dalan, nia dehan, lolos ema sira ne’ebe uza kareta estadu tenke iha konsiensia katak kareta ne’e uza ba interese publiku ou oras servisu nian, la’os uza ba nesedidade privadu nian.
“Sira hatene ida ne’e maibe dala ruma sira masa bodoh tiha,” nia dehan.