- Publika iha: 25 Agosto 2011
Sekretaria Estadu Promosaun e Igualidade (SEPI) Idelta Maria Rodrigues, hateten importansia feto partisipa iha Parlamentu Nasional (PN) hodi defende direitu feto e tanba feto mak hatene liu kona-ba nesesidade feto nian.
“Hau hanoin feto komprende liu sira nia nesesidade rasik tanba ne’e mak presiza feto maluk sira atu reprezenta iha Parlamentu hodi foti desizaun ruma koalia konaba asuntu ne’ebe relasiona ho feto sira,” hateten Deputada Gertrudes Moniz ne’ebe sai orador iha enkontru nasional kona-ba feto iha politika iha Salaun Canossa, Becora, semana kotuk.
“Se ita husik deit ba mane sira, sira la hatene no la komprende nesesidade feto nian tanba ne’e ita presiza feto iha parlamentu minimu 30% no iha setor hotu-hotu, hanesan iha governu 30%, nune’e bele akumula hanoin sira ne’ebe feto maluk sira fo,” nia sujere.
Kona-ba partisipasaun feto iha Partidu Demokratiku (PD), nia hatutan tinan-tinan PD iha planu asaun annual.
“Iha 2011 ami nia programa mak halo desiminasaun ba lei eleitoral no halo sosializasaun ba Lei Violensia Domestika (VD) inklui halo bulletin mensal partidu nian, buletin neon metin e ami mos halo konsolidasaun kada Sabadu ami tuun ba baze hato’o vizaun no misaun prezensa organizasaun mulher partidu nia ba militantes sira,” nia informa.
Entretantu tuir Sekretaria Estadu Promosaun e Igualidade (SEPI), Idelta Maria Rodrigues katak bainhira feto sira iha pozisaun diak iha partidu politiku, sai indikador ida atu sai lideransa iha future iha prosesu dezenvolvemntu tomak.
“Tanba ne’e mak feto sira kuando iha preparasaun diak konserteza futuru feto sei diak ba kualidade la’os atu prepara deit ho situasaun ida hanesan ne’e maibe prepara nafatin formasaun hodi bele sira hola parte iha setor hotu,” nia katak.
Idelta hatutan, tanba ne’e SEPI halo formasaun no sensebilizasaun ba partidos hotu- hotu oinsa sira bele iha interpretasaun diak ba lei eleitoral ida ne’ebe foin pasa hodi asegura feto sira iha posizaun iha 2012.
Alende ne’e Presidenti Rede Feto, Ivete de Oliveira hateten numeru feto iha Parlamentu tenke aumenta tanba feto barak mak iha kapasidade hanesan ho mane.
“Ita iha Timor 51% feto kompara ho mane e alende ne’e feto barak ohin loron iha ona kapasidade atu lidera povu no nasaun ida ne’e, tanba ne’e ita fo apoiu no enkoraja sira hodi kandidata aan ba iha eleisaun tinan oin,” nia dehan.