- Publika iha: 25 Agosto 2011
Durante nee estudante husi UNTL fakuldade ciensia da saude, husi departamentu parteira no departamentu infermajen halao estajiu iha klinika Bairo-Pite (KBP) tamba bele fo kontribuisaun diak ho parteira sira iha KBP hodi fo asistensia diak ba pasiente sira.
Cecilia Branca Soares nudar estudante UNTL Fakuldade Siencia da Saude, Departamentu Parteira, hateten katak nia parte halao esjagiu iha KBP senti kontente tamba doutor sira, parteira sira no infermeiru sira halao koperasaun diak ba estudante sira atu nune bele fo korajen diak ba klinika ne’e.
“Hau senti kontente los halao estagiu iha Klinika Bairo-Pite ida nee tamba saida maka ami tuir teoria iha ami nia fakuldade UNTL neba, ami mos bele halao pratika duni iha nee liu-liu ba doutor sira iha nee fo mutivasaun mai ami, oinsa halo konsulta inan isin rua sira, fo vitamina, fo imunizasaun ba bebe sira, I ami iha nee aprende mos buat barak,” hateten Cecilia iha KBP, Dilli, semana kotuk.
Tuir estajiaria Cecilia katak, doutor sira iha KBP, fo motivasaun diak ba sira estudante nebe halao estagiu nudar departamentu parteira ho infermajen hodi fo ajuda ba sira, atu nune bele fo asistensia diak liu tan ba inan sira oinsa hetan imunizasaun antes partu.
“Ami iha ne’e ami nia servisu loro-loron mak halo pemeriksaan [examinasaun] ba inan sisin rua sira, nomos fo imunizasaun ba bebe sira, I ami mos tenki fo atendimentu ba inan sira, fo konseling. Maibe kuandu besik atu partu nee tenki ba lalais ba fasilidade saude para hetan atendimentu nebe diak nomos hetan partu normal selae entaun araska oituan,”estudante Cecilia haktuir.
Entretantu Elisabete Da Costa nudar estudante estagiu mos hateten katak, nia parte halao estagiu iha KBP senti la iha failansu ba sira tamba saida mak sira aprende iha escola tenki tuir halo pratika duni atu nune sira bele hetan benefisiu diak ba aban bairua nian.
“Hau senti durante ami tuir teoria iha escola nee, agora hau mai pratika iha nee doutor sira hare ami diak, oinsa ami mos bele halo konsulta ba inan isin rua, no fo imunizasaun ba bebe sira. I ida nee importante liu ba ami atu nune karik aban bairua ami mos bele sai parteira ida ka infermeira ida nebe professional, para bele fo asistensia diak ba comunidade hanesan doutor sira nebe professional uluk nee,” estajiaria Elisabete hateten.
Entretantu Responsavel Maternidade KBP, Fransisca Cardozo, hatutan katak nia fo atende diak ba estudante sira nebe halao estagiu iha nia klinika tamba saida mak sira aprende iha escola sira aplika duni iha klinika nee, no doutor sira fo hanorin didiak no oinsa atu halo pratika nebe diak.
“Iha nee estudante Cuba la iha maibe estudante iha UNTL, liu-liu ba area Ciencia da Saude ba Departamentu Parteira no Infermajen deit. I iha nee ami mos hanorin didiak no halo oinsa ba pratika I sira mos tuir halo ho diak,nunemos iha fulan kotuk liu ba, sira tama iha fatin hotu-hotu, maibe agora nee sira halao pratika deit iha sala maternidade hodi fo asistensia diak ba inan isin rua sira. No semana ida sira halo rotasaun halao pratika,” hateten Responsavel Maternidade KBP Cardozo.