- Publika iha: 07 Julho 2012
Bazeia ba regulamentu eleitoral hosi Sekretariado Tekniku Administrasaun Eleitoral (STAE), tuku 3:00 (OTL) lokraik sentru votasaun hotu, inklui sentru votasaun iha Bairo Formosa Eskola China, Dili, komesa taka ona no prepara ba kontajen votus.Maske nune komunidade balun la konsege ezerse sira nia direitu atu vota tanba ba sentru votasaun liu oras.
“Dadersan ita preokupa tebes ho servisu uma laran tanba ne’e hau deside mai lokraik maibe hau esforsu aan mai to’o iha fatin votasaun sentru taka tiha ona. Hau sente triste tanba hau labele ezerse hau nia direitu iha loron importante ida ne’e,” dehan komunidade Paula Agustu.
Iha parte seluk, fiskais husi partido PSD, Reinaldo Borges hateten katak prosesu taka sentru votasaun lao diak tuir duni regulamentu ne’ebe STAE iha. No kona ba sira ne’ebe to’o ezerse sira nia direitu atu vota ne’e laos STAE mak sala maibe sira mak la fo inportansia ba elisaun tanba tuku 3:00 ona foin lao ba seidauk iha linha.
“Hau hare ekipa STAE koko atu halo servisu ne’ebe diak no justu maibe ita hare fatin mak klot atu halo prosesu kontajen. Iha duni diskusaun oituan entre fiskais no brigada STAE sira maibe konsege resolve hau fiar prosesu lao los,” dehan Rey Borges.
Iha oportunidade hanesan, fiskais partido FRETILIN, Vitor Maia hateten katak prosesu taka sentru votasaun tuir duni oras no preparasaun kontazen votus lao tuir regulamentu ne’ebe STAE iha maibe sira nudar fiskais lamenta ho sistema ne’ebe lori urna votus tun sae depois loke hamutuk.
