- Publika iha: 01 Outubro 2011
Vice Diretor Eskola Pre Sekundaria (EPS) Hera keixar nia Diretora MG (naran la publika) ba Komisaun F Parlamentar tanba diskunfia falsifika dokumentus ba profesores nain rua nia naran hodi foti osan.
Tuir Vise Diretor EPS. Hera Joao Reis da Cruz katak iha 2009 sira nia eskola konsege forma asosiasaun paizes profesores no pofesor Fernando da Conceiçao mak eleitu sai prezidente ba asosiasaun ne’e.
“Entaun komesa tinan ne’e kedas bainhira osan sai, sira nain rua diretora eskola mak ba foti osan,maibe depois de ida ne’e ba II no III period osan sai to’o 300 e tal nia mesak deit ona no kolega nain rua nia naran ne’e nia mak falsifika deit,” hateten Vise Diretor Joao Reis da Cruz semana kotuk (08/09) iha Parlamentu bainihra hato’o keixa iha Komisaun F Parlamentar.
“E depois iha 2010 nia dehan fali osan laiha ona,entaun osan ne’e lori ba ne’ebe,”.
Tuir nia, iha 2008, diretora ne’e mos falsifika asinatura Konsellu dos Pais no Tezoreiru eskola hodi ba foti osan iha banku “ne’e ami kaer toman rasik, depois ami halo karta ba Ministeriu Edukasaun liu-liu ba Diretor Jeral.”
Nia parte levanta kazu ne’e tanba eskola hotu-hotu publika sira nia orsamentu ho transparansia maibe sira nia eskola la publika.
“Ho rajaun ida ne’e mak ami ba buka tuir arkivu iha edukasaun rejional e konsege hetan arkivu ne’e, maibe nia halo inventa deit asinatura rezoreiru ho Prezidenti Konselu dus Pais ninian,”nia lamenta.
Entretantu tuir professor Leonardo de Deus Soares katak, orsamentu sira ne’ebe Ministeriu Edukasaun aloka ba eskola Hera ne’e atu fasilita ba atividade prosesu aprendizajen atu la ho diak.
“Maibe osan hirak ne’e profesores sira lahatene, bainhira osan sai profesores sira nunka hatene tanba diretora mesak mak ba foti e depois la fo hatene ba profesores sira,”nia preokupa.
Nia hatutan, total orsamentu ba pur periodu hamutuk US$1.215 “Asinatura naran ami nain rua nian iha maibe la’os ami mak asina maibe diretora mak inventa deit,” nia tenik.
Entretantu membru Parlamentu komisaun F Deputadu Romeo Moizes hateten komisaun sei halo audensia ho professor ne’e atu bele identifika no bele intervene problema ne’e.
“Hau husu ba diretor da eskola pre sekundaria numeru 1 atu responsabilidade osan ne’ebe mak nia halo,tanba atu foti osan tenkei desizaun koletivu la’os diretor mesak foti desizaun ba foti osan,”Romeo dehan.
Komisaun propoin para ME liu husi Inspetor jeral da edukasaun nian hodi ba halo fiskalijasaun no observasaun ba problema ne’e.
