- Publika iha: 07 Setembro 2011
Kazu ne’ebe rejistu aas durante Janeiro to’o Jullu iha Distritu Baucau mak kazu Violensia Domestika (VD) ho total 35 kazus, 23 mak ba ona iha prokuradoria no kazu 10 sei pendente.
“Kazu violensia domestika mosu tanba diskunfia malu entre fen-la’en, lakohi hein labarik e mos tanba ekonomia uma laran lasufsiente,”informa Xefe Seksaun Unidade Polisia ba grupu Vulneravel (VPU) Baucau Madalena X.Freitas,semana kotuk iha Baucau.
Tuir Freitas, kazu 10 ne’ebe sei pendente hela ne’e tanba sei hein relatoriu mediku husi Ospital Referal Baucau, 2 rezolve deit iha uma ka resolve tuir familia.
“ La’os ida ne’e deit,maibe ami mos rejistu kazu abuzu seksual ba labarik minoridade inklui kazu labarik ho labarik baku malu,” nia informa.
Freitas hatutan, kazu abuzu ba labarik minoridade ne’e iha tolu, rua iha Prokuradoria, ida sei hein rezultadu fisun.
Entretantu Administradora Sub-distritu Baucau, Regina de Sousa hateten kazu VD ne’ebe rejistu iha Distritu Baucau durante 2010-2011 fulan Abril hamutuk 150 kazus.
“Dadus ne’e ami hetan husi VPU, SIC e sira fo sai rezultadu ne’e bainihra ami halo enkontru hamutuk iha fulan Abril tinan ne’e,”nia informa.
Tuir Administradora, kazu VD dalabarak mosu tanba fator ekonomia uma laran la sufsiente.”tanba iha realidade mae mesak mak servisu buka osan e feto hein deit iha uma no bainhira mane simu osan la fob a nia fen, e ikus mai akontese violensia,”nia katak.
Husi kazu hirak ne’e, violensia tentative iha 20 kazus, violasaun seksual iha 15 kazus no violensia domestika seluk tan hamutuk 150 kazus.
Iha parte seluk vitima violensia domestika ho inisial MSL, hateten nia parte hetan violensia husi la’en rasik tanba ekonomia la sufsiente.
“sira haruka ita hein deit iha uma , hare labarik sira maibe kuandu la’en simu osan la fo entaun ita husu atu atende nesesidade uma laran, maibe osan ne’e sira uza bah emu tua no futu manu, e ikus mai ita feto mak sai vitima husi sira nia hahalok,” nia katak.
