- Publika iha: 01 Setembro 2011
Tuir Diretora Forum Organizasaun Non Governmental Timor-leste (FONGTIL), Dinorah Granadeiro , katak vantajen diak ida bainhira governu ratifika Konvensaun Halakon Formas Diskriminasaun Hotu-hotu Kontra Feto (CEDAW) maibe difikuldade bo’ot bainhira governu rasik laiha politika ne’ebe diak kona-ba asuntu jender.
“Ita nia membru governu rasik laiha konesementu diak no klean kona-ba asuntu jender, e ida ne’e difikuldade bo’ot ida baa mi hanesan sosiedade sivil, tanba bainhira ami koalia ho sira kona-ba asuntu jender, sira hatan ho liafuan mai ami katak o…ne’e asuntu feto nian, maibe ami hakarak hateten katak asuntu jender la’os feto nian de’it maibe mos mane, entaun oinsa mak it abele tau hamutuk buat sira ne’e hodi responde feto no mane nia nesesidade,”hateten Diretora Dinorah Granadeiro, semana kotuk iha workshop Asembleia FONGTIL iha Sentru Konvensaun Dili (DCC) Kaikoli,Dili.
Tanba ne’e nia parte servisu hamutuk ho NGO sira seluk hanesan Rede Feto sei fo advokasia diak liu ba Governu, Parlamentu, ba orgaun estadu hotu iha Timor-leste, atu tau prioridade asuntu ne’e katak “la’os deit iha surat tahan leten ka ita koalia deit maibe tenke hare liu ba implementasaun, ne’e mak importante,”nia dehan.
Tuir Diretora ne’e,katak asuntu jender liu-liu asuntu feto nian importante atu ema hotu bele tau konsiderasaun tanba feto mak sempre sai vitima.
Entretantu tuir Koordenadora NGO Sentru Feto Haburas Dezenvolvementu (CFHD) husi distritu Baucau,Tereza Pereira, katak asuntu jender, liu-liu asuntu feto nian ohin loron sai preokupasaun ema hotu nian, tanba durante ne’e feto mak risku liu ba prosesu dezenvolementu.
“Ne’ebe hau hanoin ita presiza tau prioridade ba asuntu feto, ema hotu tenke fo nia kontribuisaun atu nune’e ita feto mos bele partisipa iha prosesu dezenvolvementu ho diak, liu-liu governu tenke iha politika ne’ebe klaru e labele koalia deit maibe tenke iha asaun,”nia katak.
Kona-ba governu rasik laiha konesementu klean ba asuntu jender, e liu-liu lakohi koalia asuntu feto, tuir Tereza “Hau hanoin SEPI iha konesementu diak kona-ba asuntu feto nian, maibe karik membru governu seluk mak la hatene,”nia dehan.
