Ministra da Saude Interina, Doutora Elia Amaral informa katak Laboratóriu Nasional Saude iha ona kapasidade intermus rekursu humanu no ekipamentu atu halo teste ba amostra suspeitu COVID-19, maibe sei nafatin halo konfirmasaun ho Royal Darwin Hospital, Australia atu konfidente iha rezultado teste.
Nia dehan, governu ho apoia husi parseiru dezenvolvimentu sira kontinua halo esforsu kria kondisaun no kompleta ekipamentu sira hodi asegura teste ida ne’ebe mais rapidu tuir padraun internasional.
“Laboratóriu ne’e iha ona kapasidade atu halo teste ba COVID-19, maibe tanba espasu klot entau ita hetan apoia maximu husi governu Australia atu halo extensaun ba iha fatin PCR. Nune’e mosu outbreak, ita preparadu atu responde diak liu tan,” nia hateten hafoin partisipa iha serimonia lansamentu primeira pedra konstrusaun ba laboratóriu patologia no microbiologia iha Bidau, Dili.
Nia dehan kona ba rekursu humanu la menus liu no labarak liu, maibe sufisiente hela atu halo servisu tanba sei halo mos rekrutamentu balun tan hodi halo servisu. Nia haktuir governu sei fo apoiu maximu ba pesoal sira ne’ebe fo asistensia iha situasaun difisil ida ne’e.
Entretantu, Embaixadór Austrália iha Timor-Leste, Peter Roberts hateten laboratóriu parte ida ne’ebe importante tebes asaun respode ba COVID-19 tanba ne’e sira servisu hamutuk ho Organizasaun Mundial Saúde, Menzies School of Research Darwin, hodi hasa’e kapasidade laboratoriu nasional atu bele halo servisu teste.
“Australia suporta iha area teknika liu husi ONG Menzies Research atu hasa’e kapasidade hodi halo teste iha Timor-Leste no mos suporta hadia laboratoriu ida ne’e tanba laboratoriu importante tebes iha jornada luta kontra COVID-19,” nia hateten.
Nia dehan sira mos apoia espesialista moras infeksaun no microbiologia atu bele apoia ekipa laboratoriu nasional halo teste ba iha suspeitu COVID-19 iha rai laran.
Iha parte seluk, espesialista moras infeksaun hadaet labarik husi Menzies School Research Darwin, Joshua Francis hateten nia ho nia kolega espesialista infeksaun microbiologia servisu hamutuk ho laboratoriu atu estabelese diagnosa ba resistensia microbial no agora hare mos diagnostika ba COVID-19.
Nia dehan liu husi esforsu ne’ebe naruk, laboratoriu bele iha ona kapasidade atu halo teste ba iha amostra COVID-19, maske sei nafatin halo konfirmasaun iha Australia atu asegura teste ne’e los duni.
“Ami kontinua halo esforsu hodi hetan apoia husi Australia liu-liu Royal Darwin Hospital Laboratorium, Australia no Meinzes School Health Research atu teste hotu ne’ebe halao iha Timor-Leste, bele hetan konfirmasaun iha Australia. Nune’e ita bele konfidente ho rezultado ne’ebe iha,” nia hateten.
