Forsa F-FDTL-PNTL Prontu Asegura Elisaun Antisipada

Forsa Defeza (F-FDTL) hamutuk ho Polisia Nasional Timor-Leste (PNTL) prontu atu asegura seguransa iha Elisaun Antisipada ne’ebe sei akontese iha tempu badak.

Komandante Jeral F-FDTL, Major Jeneral Lere Anan Timor hateten, presiza prepara dadaun ona forsa husi instiuisaun rua ne’e molok tama ba elisaun antisipada (60 dias depois de Xefe Estadu anunsia data).
“Ami bolu komandante komponentes, unidades no munisipios mai hotu hodi fo hanoin atu oinsa ita bele responde dezafio bo’ot ne’ebe mak mosu iha ita nia oin,” Major Lere hateten, iha enkontru ne’ebe hala’o iha Quartel Jeral F-FDTL, Fatuhada, Dili.
Kona ba ekipamentos militar, nia dehan laiha problema ba fasilidade atu asegura segurans tanba uza deit fasilidade ne’ebe mak iha.
“Buat ne’ebe mak iha, ita uza ida ne’e, ita lalikan ejiji buat ne’ebe ke liu ita nia kapasidade,” nia hateten.
Nia hateten, military tenke prontu iha situasaun saida deit , ho fasilidades ou sem fasilidades, maibe kuando moras ka ain tohar, liman tohar mak la servisu.
“Dalaruma imi hanoin kona ba kareta no hahan, maibe imi mak nudar lutu ba nasaun ida ne’e, imi tenke fo buat ne’ebe imi bele fo,” nia hateten.
Nia dezafia, katak iha kampanha elisaun antisipada mai ne’e, lahatene se lider politiku sira atu ba koalia saida tan ba povu, tanba horbainhira sira koalia hotu ona.
“Agora mundu foun, keta sira ba trata malu karik, kritika malu karik ho buat sira ne’e mak dalaruma soran malu no bele hamosu emosaun,” nia hateten.
Tanba ne’e, nia apela ba lider politiku sira tenke sai ema edukadu, tenke iha maturidade no matenek para mundu bele foti ita nia naran.
Ho ida ne’e, nia hateten Timor sei sai ezemplu ba mundu tomak.
“Ita mak bele halo ida ne’e, ita konfia ita nia lider sira ne’ebe mesak Timor oan, no mos ita nia povu ne’ebe maduru sei laiha problema iha elisaun antisipada mai,” nia esperansa.
“Se mak manan, manan ona no se mak lakon, lakon ona, maibe ita hotu hamutuk servi nafatin ita nia rain.”
Entretantu Komandante Polisia Munisipio Baucau, Jose Soares hateten desde Prezidente da Republika anunsia sai katak sei iha elisaun antisipada, sira halo kedas avizu haleu Baucau laran.
“Hodi fo hatene ba komunidade sira atu hakmatek iha sira nia fatin hanesan bai-bain,” nia apela.
Nia dehan, komunidade mos tenke serviso hamutuk no parte seguransa hodi garante seguransa iha munisipio rasik, ida ne’e mak garante iha Timor laran.
Nia hateten, pesoal PNTL iha ne’eba ne’e sufisiente atu halo seguransa no mos involve husi igreja veteranus , rede klandestina ne’ebe situasaun iha ne’eba ne’e la’o diak to’o agora.