Komando Husu Polisia Prepara Aan Mantein Seguransa Iha Rai Laran

Komandante Jeral Polisia Nasiona Timor-Leste (PNTL), Julio Hornai husu Polisia munisipio Dili atu prepara aan hodi prevene no mantein servisu seguransa nian hodi haree ba situasaun politika ne’ebe la’o iha rai laran.

“Mantein imi nia pozisaun nudar forsa seguransa, hamutuk ho Falintil-Forsa Defesa Timor-Leste atu asegura establidade no paz iha rai doben ida ne’e,” nia hateten, iha Dili.
Nia esperansa, ho situasuan politika ne’ebe dadaun ne’e la’o hela ne’e la fo impaktu ba seguransa iha rai laran.
“Situasaun politika ne’ebe la’o iha ita nia rain, ita espera labele doko ita nia seguransa,” nia esperansa, iha Dili.
Nudar forsa seguransa, nia hateten tuba no firme nafatin, hamrik iha konstituisan da republika hodi mantein establidade ho paz ba rai doben Timor.
“Nune’e ita nia povu bele tuur hakmatek hodi hala’o sira nia atividade lor-loron,” nia hateten.
Alende ne’e, nia mos husu ba politika nain sira atu hakmatek hodi hanoin oinsa mak atu deside nasaun no povu nia destino.
Tanba ne’e, nia dehan PNTL ho F-FDTL esforsu nafatin atu mantein paz no establidade iha rai ida ne’e no ba povu ida ne’e atu moris hakmatek.
Entretantu komunidade Francisco de Jesus hateten, serviso seguransa ne’ebe PNTL ho FFDT-L halo ba situasuan hotu ne’ebe mosu durante ne’e, la’o ho diak tebes.
“Hau agradese ba PNTL ho F-FDTL ba imi nia esforsu aan hodi asegura seguransa iha rai no povu ida ne’e,” nia agradese.