Komunidade: Polisia Komunitariu Ladun Asegura Povu Iha Suku

Komunidade sira iha Dili laran konsidera servisu polisia komunitaria iha baze ladun hatudu rezultadu ne’ebe diak hodi asegura populasuan sira iha sukus tanba sira nia kontrolasaun ne’e la regular no baihira tempu konflito deit.

Rita Hornai Sarmento, komunidade Taibesi ne’e observa katak pesoal Polisia Komunitariu ne’ebe halo servisu iha baze, durante ne’e ladun fo seguransa ba iha populasaun sira iha suku laran.
“Hakfodak mak halo kontrolasaun, ladun kopera ho komunidade sira iha suku laran,” nia kestiona, iha Dili.
Tuir lolos ne’e, nia dehan sira tenke hala’o sira nia knar (kontrola) ne’e lor –loron hodi evita problemas, maibe la’e sira kontrola ne’e wainhira iha tempu konflito deit.
Nia hatutan, sira kuandu haree konflitu mosu, hanesan joven sira ataka malu, baku malu ne’e sira foin tun ba fatin refere hodi halo seguransa loron-loron.
“Loron bailet ita haree sira nunka halo kontrola, maibe problema ne’e komesa mosu hanesan joven sira kaer rama ambon ne’e mak sira hakfodak mai halo kontrola no iha suku no passa revista ba kareta no motor sira,” nia hatutan.
Tanba ne’e, nia sujere ba polisia komunitaria sira ne’ebe hala’o servisu iha baze, tenke halo kontrolu ho rutina, labele hein konflitu mosu foin halo kontrolu.
Entretantu Xefe Suku Dare, Gil de Araujo hateten servisu polisia komunitaria iha suku Dare lao ho diak, tanba iha koperasuan diak entre polisia ho komunidade.
“Karik problema ruma akontese iha suku laran nudar xefe suku sempre halo kontakto ho polisia atu bele asegura,” nia dehan.
Nia afirma, polisia komunitaria nia serviso mak bainhira problema ruma akontese, nia sempre tun halo atuasaun, atu nune’e problema ne’e labele bo’ot liu tan no hodi preve konflito sira ne’e policia komunitaria mak iha kompetensia tomak, ba problema iha suku laran.
Iha parte seluk Komandante Polisia Munisipiu Dili, Superintendente Assistente Euclides Belo hateten, polisia komunitaria nian kontrolasaun iha suku agora la’o nafatin iha suku laran hodi kontrola ema sira ne’e halo krime no problema iha suku laran sira tun ba halo atusaun no prevene konflito ne’e.
“Ami ho ami nia ekipa tomak iha suku Farol, ami ho xefe suku no autoridade lokal sira servisu hamutuk ho sira no hala’o nafatin ami nia knar, hanesan polisia komunitario ami kontinua la’o iha luron, iha kalan no loron hodi asegura,” nia informa.
Nia hateten, sira ne’ebe mak la rona no kontinua halo krime utiliza rama ambon, kilat manu nian iha suku laran, sira sei eduka ema sira ne’e tuir lei haruka.
Iha Lei no. 5/2017, nia dehan hatur klaru ona katak bandu ema halo krime utilize armas branka, sei prosesa tuir lei ne’ebe iha.
Nia hateten, Polisia Komunitaria sei kontinua mantein sira nia knar no kontrola iha suku laran, tanba sira nia knar atu asegura no prevene problema no konflito iha suku laran ne’e sira nia kompetensia.