Prizioneiras 10 Tuir Formasaun Literasia no Numerasia Iha Prizaun Gleno

Prizioneiras nain 10 husi nain 19 iha prizaun Gleno hetan oportunidade hodi tuir formasaun edukasaun naun-formal iha area konesementu literasia no numerasia, ne’ebe organiza husi organizasau non-governmental Psychosocial Recovery and Development for in East Timor (PRADET).

Conselleira PRADET, Olinda Mariana de Oliveira hateten formasaun literasia no numerasia ne’e programa foun ne’ebe hala’o, ho objetivu atu hasa’e abilidade no konesementu prizioneira sira nian ba letra no numeru.
Nia dehan, alfabetu mak odamatan ba konesementu maibe feto barak iha area rural vulneravel tebes tanba sira laiha abilidade ne’ebe natoon atu haklean sira nia konesementu.
“Ita liga ba parte edukasaun nota katak feto sira iha area rural, nivel konesementu minimu, la signifika sira ne’e beik, la’e, tanba sira matenek liu iha komunikasaun, tanba ne’e ami nia inisiativa ne’e atu hasa’e deit sira nia abilidade iha konese letra no numeru,” nia hateten iha servisu fatin Bidau, Dili.
Nia hatutan, objetivu seluk mak ajuda governu hodi kontribui ba iha redusaun taxa analfabetu iha Timor–Leste liu–liu ba feto sira.
Nia hateten, orario ne’ebe iha mak Tersa no Kinta- feira hodi hala’o atividade iha prizaun laran, maibe atividade sira ne’e sei espesifiku deit ba feto sira.
Alende programa edukasaun, iha mos atividade formasaun seluk hanesan kustura, artezanatu atu hakbi’it sira nia konesementu hodi produs buat ruma atu hetan rendimentu.
Nia informa, produtu ne’ebe prizoneira sira produs, sira (ekipa PRADET) rekolha no hatama iha loja sira fa’an no rendimentu ne’ebe iha ba individu sira.
Nia mos, hatutan PRADET iha programa foun ne’ebe sei apoiu prizoneira sira ne’ebe remata ona sira nia pena prizaun atu halo atividade hortikultura liga ba merkadu hodi bele sustenta sira nia vida moris hanesan sosiedade baibain.
Iha parte seluk, Diretor estabelesementu Prizaun Gleno, Mitu do Santos hateten sira iha koperasaun servisu ne’ebe diak tebes ho sosiedade sivil sira liu–liu ba area kapasitasaun no edukasaun naun-formal sira.
Nia dehan, PRADET hahu programa iha prizaun Gleno iha tinan 2010 kustura no arte, maibe iha fulan rua liu ba kria tan atividade ida mak literasia no numerasia ba iha prizioneira sira.
“Koperasaun sira ne’e hodi responde ba iha dekretu lei numeru 14/2014 kona ba formasaun transformasaun prizoneiru sira ho formasaun oioin ne’ebe iha ho objetivu atu muda sira nia mentalidade,” nia hateten.
Alende ne’e, nia dehan sira mos servisu hamutuk ho Sekretaria Estado Mulher (SEM) no NGO Belun hodi fo formasaun ba prizoneiru sira kona ba kontrola hahalok violentu no transformasaun konflitu.
Nia hatutan, ho formasaun oioin ne’ebe prizoneiru sira simu hatudu nia rezultado ne’ebe diak tebes tanba iha fulan hira liu ba sira konsege halo konstrusaun ba uma ida.
Nia informa, total prizoneiru feto no mane iha prizaun Gleno Munisipio Ermera hamutuk nain 128, tanba sira hetan transferensia husi prizaun Becora ho numeru ne’ebe bo’ot oituan.