- Publika iha: 30 Outubro 2017
Motorista Ambulansia nain 46 husi sentru saude no ospitais hotu inklui klinika Polisia Nasional Timor –Leste (PNTL) tuir formasaun kona ba primeiru secoru no jestaun ba ambulansia.
Diretor Nasional Apoiu Servisu Ospitalar e Ambulansia, Horacio Sarmento hateten formasaun ida ne’e hanesan kontinuasaun atu fo hanoin nafatin motoristas, oinsa sira bele fo atendimentu baziku ba vitima asidente trafiku iha fatin akontesementu.
Tanba motorista mak pra-mediku ne’ebe tulun pesoal saude sira hodi fo atendimentu baziku ba komunidade sira bainhira hetan asidente antes evakua ba iha ospitais.
“Fo hanoin nafatin ba sira kona ba atendimentu primeiru secoru ne’ebe sira tenke fo bainhira iha asidente no sinais tranzitu, tanba dala barak sira lori ambulansia pasiente la grave mos sira uza sirene foti dalan hotu,” nia hateten.
Nia dehan, lei kodigu estrada regula mos ba iha ambulansia, tanba ne’e motorista sira tenke hatene no kompriende bainhira mak sira uza sirene no bainhira mak la bele uza.
Nia informa, kuantidade ambulansia sufsiente hela atu responde ba iha nesesidade, tanba dadaun ne’e iha ambulansia 54 mak funsiona, maibe kualidade kareta ambulansia presiza toma konsidera.
Nia hateten, iha ambulansia balun ne’ebe sei halo hela operasaun, maibe kondisaun la premite no iha balun ne’ebe kondisaun aat, presiza halo manutensaun ho kustu ne’ebe bo’ot ($10 mil to’o 15 mil).
Iha parte seluk, partisipante Manuel da Costa hateten formasaun sira ne’e importante tebes ba sira atu haklean sira nia konesementu ba iha utilizasaun ekipamentus iha ambulansia laran.
“Ho eventu ida ne’e, bele eleva kapasidade ami motorista sira nian inklui mos motorista ambulansia Polisia Nasional Timor –Leste oinsa atu utilize dalan no fo prioridade ba kazu emergensia sira,” nia hateten.
Tanba, nia dehan bainhira motorista laiha konesementu ba utilizasaun ekipamentus sira iha ambulansia laran bele failha no ameasa ba vida pasiente nian.