- Publika iha: 26 Outubro 2017
Ministeriu da Saude (MdS) entrega tan motorizadas 52 ba koordenador programa nutrisaun sira iha munisipio 10, hodi fasilita diak liu tan servisu monitorizasaun ba suplementu aihan ba labarik no inan sira iha area rural.
Diretor Nasional Saude Publika Ministeriu da Saude (MdS), Pedro Canisio hateten governu iha esforsu maka’as tebes atu haforsa servisu nutrisaun nian iha teriotorio tomak hodi bele ajuda redus taxa malnutrisaun iha Timor –Leste.
Nia informa, tratamentu ba nutrisaun iha oin rua : mak tratamentu iha ospital liu –liu baixa ne’e bele kontrola, maibe ba sira ne’ebe ho malnutrisaun moderadu hetan suplementu iha uma tenke kontrola rutina atu hatene kresimentu labarik sira nian.
Tanba ne’e, ministerio hamutuk ho parseiru dezenvolviementu UNICFE ho apoiu husi Unian Europea (UE), deside fahe motor ba pesoal nutrisaun sira tanba kondisaun estrada no geografikamente liu –liu komunidade sira hela do’ok malu.
“Fo motorizada ba sira atu sira bele la’o tuir pasiente sira ne’ebe ho malnutrisaun kada semana hodi haree labarik sira nia kresimentu depois konsumu suplementu nutrisaun,” nia hateten hafoin entrega motorizada iha Armagen Saude Bebora, Dili.
Nia informa, antes ne’e sira fahe ona ba iha munisipio Ainaro, Bobonaro no Ermera atu distribui ba iha koordenador nutrisaun kada sentru saude.
Nia hatutan, suplementu nutrisaun ba inan isin rua no inan fo susu ne’ebe sofre malnturisaun mak Timor Vita no ba labarik sira iha planpysup no planpynat.
Nia dehan, suplementu sira ne’e sufsiente hela iha armagen sentru saude sira hodi distribui ba labarik no inan sira ne’ebe sofre malnutrisaun.
Enkuantu dadus Ministeriu da Saude nian iha tinan 2013, hatudu katak labarik tinan lima mai kraik hamutuk 50% mak sofre malnutrisaun grave no moderadu.
Iha parte seluk, Delegada Saude munisipio Dili Agustinha Seguerado agradese ba apoiu parseiru dezenvolvimentu sira nian ba iha programa nutrisaun iha Timor –Leste.
Nia dehan, malnutrisaun sai problema nasional ne’ebe presiza esforsu husi linha ministrio sira, tanba dadus hatudu prevalensia ne’ebe bo’ot tebes labarik no inan feto sira sofre malnturisaun.
“Iha munisipio Dili iha sentru saude 6, maibe agora ami hetan motorizada lima hodi haforsa servisu nutrisaun nian liu –liu monitorizasaun, supervizaun no follow up kondisaun labarik sira nian kada fulan fulan tolu,” nia hateten.
Nia dehan, peskiza 2013 hatudu Munisipio Dili sai segundu lugar ba iha problema malnturisaun ho 35% raes badak no 27% krekas depois munisipio Ermera, maibe numeru ida ne’e tun ona ba iha 10% iha tinan 2016.
Nia dehan, sira mos tau ona orsamentu ba iha manutensaun no kombustivel ba motorizada sira ne’e hodi fasilita servisu iha terenu.