- Publika iha: 21 Junho 2013
Tuir Prezidente Grupu Mulher Parlamentar Timor-Leste, Deputada Josefa Alvares Soares katak agora seidauk tempu para atu lokaliza atividade prostituisaun iha fatin ida tanba sosiedade no igreja kontra maka’as hahalok ida ne’e.
Prezidente Grupu Mulher Parlamentar Timor-Leste (GMPTL), Deputada Josefa Alvares Soares, dehan tenke kuidadu ho hanoin sira ne’e tanba alem de kontra doutrina Igreja Katolika mos tanba la kondis ho kultura Timor nian.
“Seidauk tempu para ita atu lokaliza sira iha fatin especial ida ho medikus sira atu kontrola sira,” dehan Prezidente GMPTL, Deputada Josefa Alvares Soares, (29/04), iha Parlamentu Nasional.
Tuir nia, buat ne’ebe presiza halo agora dadaun mak ema hotu tantu feto no mane tenke iha konsiensia atu hado’ok an husi atividade ne’e tanba igreja bandu no la kondis ho kultura Timor –Leste nian.
Entretantu Diretora Ezekutivu Rede Feto, Yasinta Luzinha hateten, atu lokaliza fatin prostituisaun presiza halo diskusaun no konsultasaun ida klean, nune’e ema hotu bele hato’o sira nia hanoin kona ba asuntu ne’e.
Nudar organizasaun ida ne’ebe durante ne’e tau matan ba feto, durante ne’e Rede Feto preokupa liu kona ba feto prostitute sira nia saude no seguransa, tanba sira hala’o atividade ida ne’e namkari deit e laiha ema ida mak kontrola.
“Ami hanesan organizasaun feto defende direitu feto no promove feto, katak feto sira ne’ebe hetan violasaun inklui mos maluk feto sira ne’ebe hala’o atividade prostituisaun ami nafatin defende sira bainhira hetan violasaun,” katak Diretora Luzinha.
Iha esbosu Lei Trafiku Humanu mos koalia kona ba prostituisaun no seluk tan maibe atu kriminaliza prostituisaun ne’e kontra direitus humanus tanba atividade ne’e iha mundu ema konsidera hanesan profisaun ida, ema iha direitu atu halo “maibe depende mos ba nasaun ida-idak nia hanoin,”.
Iha okaziaun ne’e, rede Feto husu ba Polisia atu halo investigasaun ida diak, hodi buka tuir se mak organiza atividade ida ne’e.