Mds Simu Tan Forsa Trabalho Foun 325

Ho programa regime internatu, Ministerio da Saude (MdS) sei simu tan forsa trabalho foun hamutuk nain 325 hodi kompleta asistensia saude iha fasilidade saude sira iha area remotas.

Vise Ministru Saude, Luis Lobato hateten forsa trabalho ne’e mai husi eis bolseirus MdS nian ne’ebe hasai estudu hanesan mediku, parteira, enfermeiru/a, farmasista no analista iha rai laran no estrangeirus.
Nia dehan, prezensa eis bolseiru sira ne’e pertenente tebes hodi garantia asistensia ne’ebe kompletu, tanba iha fasilidade saude barak iha area rural mak sei menus rekursu humanu liu –liu parteira, farmasista no analista.
“Presiza reforsa rekursu humanu, ita tenke buka aumenta tan ema iha fasilidade saude sira tanba iha fasilidade saude balun ema barak no iha balun ema ida rua deit, laiha analista no farmasista,” nia hateten bainhira hasoru malu ho eis bolseiru sira iha salaun INS Comoro, Dili.
Nia dehan, professional saude foun sira ne’e sei koloka tuir sira nia munisipios no postu administrative atu minimize mos osan alojamentu nian.
Nia hateten, ministerio iha orsamentu oituan ne’ebe sei fo ba sira hanesan subsidio atu sira bele han no hemu.
Nia hatutan, oras ne’e dadaun professional saude foun sira ne’e tuir hela briefing kona ba regulamentu no regras servisu saude nian no sistema saude iha Timor –Leste, atu sira iha konesementu hodi adapta aan iha sistema.
Iha parte seluk, Mediku foun Felis dos Santos hateten sira pronto atu servi povu ho matenek no konesementu ne’ebe sira hetan durante iha estudu, tanba estado investe ona ba sira ho osan povu nian.
“Ami kontente ho programa regime internatu ida ne’e, tanba fo oportunidade ba ami atu servisu iha fasilidade saude,” nia kontente.
Hanesan mediku foun, nia dehan presiza tebes supervizaun husi mediku tuan sira hodi hariku no hametin sira nia kuinesementu tekniku balun tan.