FA Kontinua Fo Bolsu Estudu Ba Feto Kbi’it La’ek

Diretora Ezekutivu Fundasaun Alola (FA), Alzira Reis hateten bolsu estudu sai hanesan programa annual fundasaun nian hodi tulun feto (kbi’it la’ek) sira asesu ba edukasaun iha nivel ne’ebe aas.

Nia dehan, kada tinan sira fo oportunidade ne’e ba foinsa’e feto no mane balun ne’ebe familai laiha kbi’it hodi kontinua sira nia estudu iha universidade.
“Tinan kotuk ami nia bolseiru nain 9 mak gradua ona husi universidade, tanba ne’e agora sira halo servisu voluntario iha ne’e (Alola) hodi hasa’e sira nia abilidade no esperiensia servisu iha organizasaun nian,” nia hateten, iha Kaikoli, Dili.
Nia hateten, kada tinan sira fo bolsa ba ema nain 200 atu halo estudu iha ensino primaria, sekundaria no unversidade tanba ne’e bolsu ne’e kontinua nafatin.
Nia dehan, sira fo prioridade ba feto sira tanba realidade hatudu persentagen feto asesu ba ensino superior kada tinan ki’ik tebes kompara ho mane sira.
Nia hatutan, realidade iha sosiedade ida ne’e hatudu bainhira familia laiha kbi’it atu suporta oan ba eskola, feto mak ema ne’ebe primeiru la hetan oportunidade ida ne’e.
Nia informa, tinan kotuk iha bolseiru nain rua mak hapara sira nia bolsa, tanba ida deside ba halo servisu iha estrangeirus no ida seluk isin rua ho hili haree familia deit.
Entretantu, Diretor Jeral iha Ministeriu Edukasaun Antoninho Pires hateten dadus anualmente ne’ebe sira hetan husi universitarios, persentagen feto liu 30%, la’os deit ensino superior maibe ensino sekundario mos.
“Iha eskola balun, registrasaun feto barak liu mane no iha balun mos feto oituan, maibe persentagen sempre 30% ba leten,” nia hateten.
Nia dehan, inskrisaun tinan ida ne’e (2018) seidauk tama, maibe iha tinan kotuk kuaze 45% feto tama iha ensino superior.