UE Apoiu Tan $672,000 Ba Prevensaun no Metigasaun Dezastre Naturais

Uniaun Europeia (UE) anunsia apoiu fundu ho montante £550,000 ka $672,000 ba governu, liu-liu Sekretariu Estadu Protesaun Sivil (SEPS) ba projeitu rezilensia komunidade nian ba dezastre iha Timor-Leste, ne’ebé sei foku ba edukasaun no sosializasaun hasa’e konsensia públiku konaba kauza dezastre, sinais no sintoma dezastre inklui asaun prevensaun ne’ebé tenke halo, bainhira akontese dezastre.

Sekretariu Estadu SEPS, Domingos Mariano Reis hateten projeitu ne’e nia objetivu mak atu halo metigasaun no prevensaun risku dezastre iha Timor-Leste ho indikador importante ruma mak komunidade jeral iha nivel aldeia to’o munisípiu no komunidade eskola nivel primaria to’o sekundariu tanba ne’e alvu ba atividade sira ne’e mak estudante no komunidade jeral.

“Kontribuisaun sidadaun hotu ne’e importante sai hanesan save hodi lori susesu ba Timor-Leste ida ne’ebé seguru husi dezastre. Kontribuisaun komunidade nian liu husi tenke iha koñesementu konaba kauza dezastre, sintoma no sinais dezastre, oinsa atu prevene no kuidadu bainhira sira hetan dezastre sira rasik bele responde hodi asegura sira nia aan husi fatin risku ba fatin ne’ebe seguru,” nia hateten hafoin partisipa serimonia lansamentu fundu ba projeitu rezilensia komunidade nian ba dezastre iha Timor-Leste ba Faze II nian iha salaun SEPS Caicoli, Dili.

Nia hateten projeitu ne’e lao durante tinan rua, entau espera bele hasa’e duni konsensia públiku nian atu kontribui ba risku dezastre no elemina risku dezastre iha Timor-Leste, hodi promove poupansa ba orsamentu estadu nian.

Nia haktuir despesa ne’ebé governu hasai kada tinan purvolta $20,000,000 hodi halo metigasaun ba dezastre naturais, liu-liu apoiu emerjénsia no rekuperasaun ba vitima sira.

Iha parte seluk, Adjuntu Xefi Misaun Uniaun Europeia, Cristoph Sorg hateten implementasaun projetu faze dahuluk lao susesu tebes tanba ne’e ida ne’e ba kontinuasaun ba hasa’e koñesementu no konsensia públiku nian atu sai reziliente liu tan hasoru dezastre naturais.

“Uniaun Europeia iha atu kontribui ba halo sosializasaun hasa’e konsensia públiku nian konaba krize no iha Timor-Leste ita hare liu ba dezastre naturais,” nia hateten.

Nia espera projetu ne’e bele lao ho susesu liu tan iha hasa’e koñesementu komunidade nian konaba kauza no risku dezastre atu sai komunidade ne’ebé rezilente liu tan hasoru dezastre naturais.