Alojamentu Fatin Turistiku Barak Mak Laiha Kondisaun

 Diretor Jeral iha Ministerio Turismu e Kultura (MTK), Jose Quintas hateten maioria alojamentu fatin turistiku sira iha rai laran barak mak seidauk iha kondisaun ne’ebe diak, intermus kualidade, hygiene no atendementu.

Nia dehan, akomodasaun fatin tolu hanesan akomodasaun Com, Munisipio Lautem, Loihunu iha Ossu, Munisipio Viqueque no Hatuberlico iha Munisipio Ainaro mak hetan ona rekonesementu husi organizasaun Mundial Turismu, tanba iha kondisaun diak.
“Ita komesa promove ona fatin tolu ne’e, maibe lataka dalan mos ba iha maluk sira seluk atu bele hadia aan,” nia hateten iha servisu fatin Motael, Dili.
Nia hateten, ba sira ne’ebe kondisaun seidauk diak governu tau mos numeru kontaktu, sei tau foto iha pamfletu atu turista sira bele kontaktu bainhira sira hakarak vizita fatin turismu sira iha area refere.
Alende pamfletu. Nia dehan governu mos kria ona website ida hodi halo promosaun ba iha fatin turismu sira iha rai laran inklui ho fasilidades, transporte ne’ebe iha hodi fasilita turista sira hetan informasaun.
Portantu dadus MTK hatudu, katak kada tinan numeru turista ne’ebe mai Timor –Leste sa’e, tanba iha tinan 2016 kuaze 61 mil turista mak mai vizita no tinan 2017 sa’e ba 71 mil resin.
Husi dadus ne’ebe iha, turista sira ne’e maioria mai husi nasaun Australia nune’e mos nasaun seluk, maibe barak liu mai halo servisu no negosio, iha 20 mil resin mak pasa ferias.
Entretantu, Manager Programa iha Fundasaun Haburas, Pedrito Vieira hateten problema saneamentu baziku no higiene sai obstaklu bo’ot ba dezenvolvimentu turismu iha rai laran, tanba maioria fatin alojamentu sira ne’e laiha kondisaun ne’ebe diak intermus higiene.
Nia dehan, durante akompania turista visita fatin turismu historiku sira iha munisipios, turista barak mak preokupa ho fasilidade no akomodasaun sira.
“Ami lori turista sira visita fatin turistika sira iha baze, sira barak preokupa ho ita nia fasilidade no akomodasaun ne’ebe ladun moos, bainhira sira visita fatin ida ba fatin seluk sira preokupa liu tanba sira toman ona moos,” nia hateten.
Nia hatutan, turista barak mak hateten sira la presiza fatin ne’ebe furak liu (mewah), maibe importante simples no moos.
Nia hateten, turista sira ne’ebe sira akompania mai husi grupo estudantes husi nasaun Australia no Japaun ne’ebe mai kada tinan.