STAE Sosializa Kalendario Resensiamentu Eleitoral

Sekretariado Tekniku Administrasaun Eleitoral (STAE) realiza primeiru enkontro ho Partido Politiku sira hodi fahe informasaun kona ba kalendario resensiamentu eleitoral, atualizasaun baze dadus no preparasaun tekniku ba Elisaun Antisipada iha loron 12 fulan Maio 2018.

Diretor Jeral STAE, Acilino Manuel Branco hateten servisu resensiamentu eleitoral no aktualizasaun baze de dadus la’o ona iha postu administrative sira hotu iha teritorio tomak, atu fasilita eleitores ne’ebe halo resensiamentu no muda hela fatin.
Nia dehan, tuir lei numeru 6/2016 kona ba resensiamentu hateten servisu ida ne’e kontinua, tanba ne’e depois elisaun parlamentar tinan kotuk hala’o nafatin, maibe durante ne’e iha nivel munisipio.
Nia hatutan, importante tebes atu partidus politiku halo akompaniamentu ba iha prosesu sira ne’e tomak, tanba tuir lei atividade resensiamentu eleitoral ne’ebe STAE hala’o hetan supervizaun husi Comisaun Nasional Elisoens no fiskaliza husi partidu politiku sira.
“Oportunidade ida atu informa ba ita nia partidu politiku sira hodi halo fiskalizasaun ba aktus ida ne’e, tanba atividade ida ne’e lao hela hamutuk ho preparasaun ba elisaun antisipada ne’ebe ita sei realiza iha tempu badak,” nia hateten iha servisu fatin Kaikoli, Dili.
Nia dehan, resensiamentu eleitoral sei hala’o mos iha estrangeirus hanesan Australia, Portugal, Korea do Sul no Inglatera.
Alende ne’e, nia dehan ho enkontru ne’e bele STAE bele hetan mos ideias balun husi partidus politiku kona ba sistema tomak hodi bele dezenvolve planu prepasaun ne’ebe diak liu tan iha loron elisaun.
Nia hateten, tempu ne’ebe sira iha atu halo preparasaun sira ne’e mak limitado tebes, tanba ne’e sira tenke halo servisu extra hodi halo servisu prepasaun sira ne’e intermus logistika.
Nia informa, sira hato’o ona proposta orsamentu ba iha Ministerio Finansas atu iha ajustamentu ruma hodi asegura servisu operasional sira iha terenu.
Maske la temi montante orsamentu ne’ebe iha, maibe nia dehan montante diferente ho elisaun tinan kotuk, tanba agora tempu udan servisu logistika no mobilizasaun sira ne’e diferente bele fo implikasaun ba iha orsamentu.
Entretantu reprezentante Partidu KHUNTO, Hilario G. Fraga husu ba STAE atu halo mos kontrolu ida ne’ebe rigorozu ba iha funsionario iha nivel postu administrative sira, tanba barak mak abandona servisu.
“Hau observa, akontese beibeik iha postu administrative sira ema (komunidade) mai hein bar-barak, funsionario sira mai tuku 9:00 parte dader no tuku 3:00 parte lokraik entaun ema hein kleur sira fila,” nia hateten
Nia hateten, atitude hanesan ne’e la fasilita komunidade sira tanba barak mak dehan sira la vota no vota mos nafatin estudante, negosiante. Ho ida ne’e bele implika ba iha taxa partisipasaun tun.
Tuir observasaun TDW iha terenu, haree katak enkontru ne’e ladun hetan partisipasaun maximu husi reprezentante partidu politiku ne’ebe eziste.