Ministeriu da Saude Asina MoU Koperasaun Ho NGO Hat

Ministerio da Saude (MdS) asina Memorandum Of Undestending (MoU) koperasaun servisu ho organizasaun non-governmental nasional no internasional hat hodi apoia hadia no hasa’e kualidade prestasaun saude primaria iha Timor –Leste.

Organizasaun hat ne’e, mak organizasaun Psychosocial Recovery and Develompment for in East Timor (PRADET) ho papel fo asistensia ezaminasaun forensic no akonselamentu ba iha vitima violensia bazeia ba jeneru no moras mental, NGO World Vision haree ba nutrisaun, saude inan ho oan no bee moos, NGO Frontline iha area edukasaun promosaun saude ambiental no NGO Balibo Trust House iha area saude oral.
Diretora Jeral Prestasaun Servisu (DJ-PS) Ministerio da Saude (MdS), Odete Viegas hateten papel organizasaun sira importante tebes atu ajuda ministerio hodi alkansa objetivu ida ‘povu saudavel iha Timor –Leste ne’ebe saudavel’ liu husi habelar informasaun saude no kuidadu saude primaria ba iha komunidade sira iha nivel rural, tanba ministerio labele halo servisu mesak.
Nia hateten, MoU ne’e atu reforsa deit koperasaun, koordenasaun servisu entre MdS hanesan nain ba programa saude ho parseiru implementador sira hodi ajuda prevene moras sira mai iha kuidadu sekundario no tersiario.
Nia dehan, hanesan moto foun MdS ne’ebe hateten hanesan ekipa “ami iha ne’e atu servi ita bo’ot sira”, signfika Miniserio Saude hamutuk ho parseiru sira pronto servi komunidade sira.
“Ita buka servisu iha ekipa liu husi koordenasaun, komunikasaun ne’ebe diak atu ita bele alkansa ita nia objetivu ba ita nia povu, liu –liu ba prestasaun servisu saude,” nia hateten hafoin asina MoU ho Parseirus iha salaun Palacio da Sinzas Kaikoli, Dili.
Nia hatutan, ministerio sei iha tan kooperasaun ho organizasaun seluk ne’ebe durante ne’e servisu ba iha area prestasaun servisu saude liu –liu kuidadu saude primaria.
Entretantu Country Representative World Vision Jose da Costa konsidera akordu ne’e hanesan dokumentu konfiansa no supporta ida husi governu ba iha organizasaun non-governmental sira nia programa iha setor saude.
“Ami haree liu ba nutrisaun sensitivu agrikultura, katak programa kombinasaun entre nutrisaun no agrikultura tanba nutrisaun labele hamrik mesak sem agrikultura liu –liu aihan sira,” nia hateten.
Nia dehan, servisu ne’ebe sira halo mak motiva komunidade sira atu halo to’os uma hun hodi hasa’e produsaun aihan iha familia no eduka komunidade sira oinsa tein aihan local ne’ebe riku valor nutrisaun ba iha familia.
Nia hateten, programa sira ne’e implementa ona area rural sira iha munisipio Baucau, Aileu, Maliana, Covalima no iha planu atu extende ba munsipio seluk, maibe sei haree ba rekursu finanseiru hodi apoiu implementasaun.
Entretantu Country Representative Frontline Kayono Nakajima, hato’o agradesementu wa’in ba iha Ministerio Saude nia konfiansa ba sira atu hala’o programa edukasaun promosaun saude ambiental ba komunidade sira iha area rural, kontribui ba iha redusaun moras hadaet no lahadaet sira iha Timor –Leste.
“MoU ne’e atu haforsa ami nia kooperasaun ho Ministerio Saude iha komunikasaun saude komprensivu ne’ebe diak hodi atinji komunidade ne’ebe saudavel,” nia hateten.
Nia dehan, Frontline mak organizasaun Japaun nian ne’ebe harii iha 2009, ho papel importante fo edukasaun promosaun saude ba komunidade sira iha area rural, liu –liu importansia utilize sanitasaun no latrinas (sintina) ba iha saude publiku.