Governu Inisia Lei Orden ba Advogadu

Governu liu husi Ministeriu Justisa inisia lei orden dos advogadu atu regulariza atividades advogadu liu-liu advogadu privadu sira.

Ministru Justisa, Ivo Valente hatete kontiudu husi lei ne’e mak atu hatur klarumente kona ba oinsa relasaun entre advogadu privadu ho sistema justisa iha Timor no kooperasaun bilateral ho nasaun sira seluk inklui oinsa relasaun advogadu husi liur ho advogadu iha rai laran.
Durante ne’e, nia hatete regulamentu hirak ne’e seiduak eziste enkuantu numeru advogadus privadu aumenta barak iha Timor.
“Entaun ita regularize sira liu husi prosposta lei ne’e,” Ministru Valente hateten.
Iha lei orden ba advogadu ne’e mos, nia dehan sei hatuur artigu balun hodi fo dalan ba avogadus privadu hodi determina rasik sira nian estatutu.
Kona ba sira nia estatutu, nia dehan governu sei entrega ba avogadu sira hodi halo diskusaun internal entre sira, hafoin ne’e lori ba Parlamentu Nasional atu halo aprovasaun.
“Sira mak sei diskute, depois konklui katak sira presiza estatutu ida oinsa, maibe tenke definitivu tuir lei,” nia hateten.
Iha parte seluk Vise Komisaun A Parlamentar (konsitituisaun, justisa, administrasaun publika, poder local, anti korupsaun), Arao Noe rekonese katak lei ne’e agora dadaun iha hela fase diskusaun komisaun nian.
Nia informa, lei ne’e tama mai iha komisaun iha kedas 2013 maibe la konsege halo diskusaun iha momentu ne’eba tanba deputadu sira iha komisaun A halo uluk diskusaun ba lei importante sira.
“Lei ne’e importante atu diskute hodi regularize advogadus privadu ne’ebe mak hala’o knar iha Timor, tanba barak los ona,” nia dehan.
Tuir nia,presiza duni iha lei atu konsidera servisu advogadus privadu iha timor inklui hatur lolos saida mak sira bele no labele halo.