Asosiasaun Feto Husu PARPOL Konsidera Kuota 30% Iha Lista Kandidatura

Atu garantia reprezentante feto iha Parlamentu Nasional, asosiasaun feto sira husu ba Partidos Politiku (PARPOL) atu respeita lei eleitoral ne’ebe konsidera kuota 30% ba feto sira nia reprezentasaun iha vida politika.

Prezidente Asosiasaun Feto Munisipio Aileu, Cristinha da Conceição hateten organizasaun feto sira hamutuk ho agensia internasional halo esforsu tomak prepara ona feto sira liu husi kapasitasaun, maibe fila ba partido politiku sira mak kompetensia tomak atu garantia feto nia reprejentante iha parlamentu no estrutura governu.
Nia dehan, advokasia halo bei-beik ona liu husi rekomendasaun no direita ba partidu politiku sira atu respeita lei ne’ebe asegura feto nia involvimentu iha vida politika, maibe nafatin iha dezafiu.
“Ita hato’o rekomendasaun ba partidu politiku sira katak lei hateten entre ema nain tolu tenke iha feto, lasignifika iha lista kandidatura ne’e feto iha numeru 3, maibe feto bele numeru 1, 2 no bele feto hotu,” nia hateten via telefone.
Nia dehan, realidade ne’ebe akontese, partidu politiku sira sempre tau feto iha numeru 3 entaun difisil feto sira atu hetan fatin hodi reprezentan povu liu –liu feto iha Parlamentu Nasional.
“Sira (lider partidu politiku) seidauk iha sensibilidade jeneru, ne’e presiza ita nia luta nafatin,” nia hateten.
Nia mos, husu ba partidu politiku sira atu toma responsabilidade hodi fo mos kapasitasaun ba feto sira iha kada partidu no konsidera sira iha lista kandidatura.
Iha parte seluk, Xefe Suku Soba, postu administrative Laga, Munisipio Baucau, Francisca Monica hateten lei ne’e garantia feto nia involvimentu iha vida politika, maibe dala barak implementasaun mak seidauk tanba sensibilidade jeneru iha vida politika ne’e sei menus.
“Ami hakarak reprezentasaun feto iha Parlamentu Nasional no governu hanesan mos iha periodu governu anterior,” nia hateten.
Nia espera, feto sira ne’ebe sei hetan fiar reprezenta feto iha Parlamentu Nasional iha elisaun antisipada ida ne’e bele reprezenta dunik feto sira hodi hala’o knar tuir lei haruka atu fo atensaun ne’ebe diak liu tan ba situasaun feto iha Timor –Leste.
Portantu reprezentasaun feto iha Parlamentu Nasional dinamiku iha kada periodu, tanba iha periodu 2012-2017 iha 38,5% husi 65 kadeiras iha parlamentu, no periodu elisaun tinan kotuk (2017) reprezentasaun feto iha 32,3% ou 21 kadeiras husi 65 kadeiras.