- Publika iha: 29 Novembro 2017
World Vision Timor –Leste (WVTL) servisu hamutuk ho komunidade no organizasaun feto sira hodi forma ekipa hadomi familia iha suku 10 iha munisipio Aileu.
Deputy Country Director WVTL, Jose da Costa hateten sira iha programa jeneru ne’ebe ho naran Dalan ba Esperansa, ho objetivu atu servisu hamutuk ho lideransa sukus, igreja no Polisia no organizasaun feto sira hodi fo protesaun no asistensia ba vitima violensia bazeia ba jeneru.
Nia dehan, ekipa hadomi familia sei sai promotor no ezemplu ba iha komunidade sira kona ba promosaun igualidade jeneru iha sira nia suku no sai matadalan ba iha vulneravel sira ne’ee hetan violensia.
Alende ne’e, nia dehan sira nia papel importante ida mak fo mensagen ba komunidade sira kona ba direitu feto no igualidade jeneru atu komunidade bele iha konsensia hodi respeita malu iha uma no sosiedade laran.
“Violensia domestika la’os kestaun iha lei deit maibe konsiensia ema nian, entaun liu husi ema hotu nia kontribuisaun bele ajuda redus violensia iha uma laran no sosiedade,” nia hateten iha nia servisu fatin Bidau, Dili.
Nia dehan, sira mos asina akordu kooperasaun servisu ida ho Madre Ismaic Dare hodi oferese espasu ba vitima sira hela provizoriumente, tanba iha muninisipio Aileu seidauk iha uma mahon.
Nia hateten, luta ba redus violensia domestika sei hasoru dezafiu bo’ot tanba ema nia komprensaun ba lei kontra violensia domestika ne’e sei minimu tebes.
Nia dehan, tuir lei violensia domestika ne’e krime publiku signifika se deit haree no rona bele relata, maibe realidade iha Timor –Leste vitima rasik mak tenke ba keixa no koalia.
Iha parte seluk, Prezidente Asosiasaun Feto munisipio Aileu Cristinha da Conçeicão hateten sira iha kooperasaun servisu ne’ebe diak tebes ho organizasaun sira hodi sosializa no promosaun ba direitu feto iha nivel suku.
“Ami servisu hamutuk fo formasaun no treinamentu ba grupo komunidade sira kona ba promosaun igualidade jeneru,” nia hateten.
Alende grupo promotor ba iha kontra violensia hasoru feto, nia hateten WVTL mos forma grupo hortikultura no fo formasaun ba sira hodi hasa’e produsaun aihan hodi kontribui ba iha redusaun malnutrisaun iha familia.