- Publika iha: 28 Fevereiro 2017
Organizasaun feto Fundasaun Alola (FA), husu ba grupo feto soru tais sira atu prezerva no mantein originalidade tais Timor nudar identidade nasuan nian.
Tanba tuir Diretora Fundasaun Alola, Alzira Reis katak kompania estrangeirus balun hahu imprime ona hena baibain ho motivu tais hodi responde ba ejizensia merkadu nian.
“Hau husu ba grupo sira kontinua tau imi nia esforsu atu prezerva saida mak ita nia avo sira husik hela mai ita, tanba ida ne’e mak ita nia identidade,” nia sujere bainhira halo abertura ba feira Alola nian, iha Dili.
“See timoroan sira la prezerva, entaun produtu origin Timor nian bele mohu.”
Nia hateten, halo produsaun la’os ba fa’an hetan osan deit, maibe tenke promove mos kultura tanba ho ida ne’e bele atrai turista sira vizita kada munisipios.
Nia hateten, hakbi’it ekonomia sai hanesan prioridade ba sira, liu –liu hasa’e kapasidade grupos produtor sira nian hodi hadia kualidade produtus.
“Ekonomia familia la forte, maka malnutrisaun bele akontese tanba sira laiha osan hodi sosa hahan ne’ebe iha valor nutrisaun, edukasaun ba labarik mos menus liu –liu asesu labarik sira nian ba ensino,” nia hateten.
Maske merkadu sai dezafiu bo’ot ba iha grupos feto, maibe nia dehan kada tinan sira loke feira dala rua hodi fo oportunidade ba sira fa’an sira nia produtu no sira mos iha mini loja hodi fa’an produtus husi grupo sira.
Iha parte seluk, Membru Parlamentu Josefa Alvares Pereira Soares, hateten tais origin husi munisipio balun lakon ona tanba barak mak moderniza ona intermus nia motive no material sira.
“Tais origin ne’ebe halo ho kabas local, tein ai kulit no ai tahan sira hodi halo koor, ne’e kualidade diak liu kompara ho tais ne’ebe halo uza kabas importadu, tanba nia kor sei la mantein,” nia hateten
Nia dehan, ema barak mak agora soru tais uza material importadu, tanba fasil no lais atu produs tais ida, enkuantu uza material lokal presiza tempu fulan rua-tolu ou dala ruma to’o tinan.
Nia dehan, Timor –Leste seidauk iha lei ida proprio atu proteze produtu local hanesan tais no seluk tan.