- Publika iha: 23 Março 2024
Autoridade Munisípiu Aileu no Ainaro husu ba governu atu halo kontrola ba programa merenda eskolár, atu nune’e bele haree direta hahán ne’ebé oferese ba eskola sira iha territóriu Timor-Leste laran tomak.
Reprezentante Presidente Autoridade Município (PAM) Aileu, Pedro dos Santos da Silva hateten, haree ba realidade, tinan-tinan governu sempre ko'alia makas liu ba nutrisaun, liuliu halai ba merenda eskolár hodi investe osan makas, maibé iha fatin balun governu la kontrola, tanba ne’e husu ba governu atu kontrola merenda eskolár ne’e.
“Ita tenke tun direta atu bele sai hanesan monitorizasaun efetivu di'ak liutan, atu nune’e bele kontrola ai-han sira ne’ebé mak iha merenda escolar. Atu nune’e bele haree mós katak, iha merenda eskolár ne’e ba duni estudante sira mak han ka lae, tuir duni kritéria ne’ebé governu fó ka lae,” nia hateten hafoin halo lansamentu ba projetu USAID Avansa Sistema Ai-han no Nutrisaun (SAN), iha Timor Plaza, Díli.
Nia dehan, lansamentu refere di'ak tebes, atu bele eleva liutan programa merenda eskolár, no hadi'a di'ak liutan sistema merenda eskolár iha futuru, maibe nia husu ba governu atu tau matan ba iha merda eskolár, hodi hamenus malnutrisaun iha Timor-Leste.
Iha fatin hanesan reprezentante Presidente Autoridade Município (PAM) Ainaro, Aguida Judit Mendonça, hateten haree ba malnutrisaun ne’ebe mak kontinua sa'e iha nivel nasionál, nia espera liuhusi lansamentu refere bele hasa'e agrikultura nia kualidade no kuantidade produsaun iha rai laran.
“Entaun esforsu makas, ida mak ami tenki servisu makas iha agrikultura, liuliu mós ho ajénsia sira ne’ebé implementa sira-nia projetu iha Munisípiu Ainaro ne’ebé halai ba oinsá atu bele redús malnutrisaun iha Munisípiu Ainaro. Ita tenta ona para atu 70% ba ai-han lokál ne’ebé bele fornese ba iha merenda eskolár no 25% bele mai husi prontu fábrika nian. Tanba ne’e husi parte autoridade hakarak esforsu tebes oinsá mak atu bele kopera no servisu hamutuk liuliu ho parte edukasaun, nune’e bele suporta ai-han lokál ba iha merenda escolar,” nia hateten.
Nia hatutan, tanba iha munisípiu parte área rurál, susar atu asesu ba iha produsaun sira ne’ebé iha nutrisaun di'ak, no katak ida-ne’e difikulta tebes ba sira, tanba ne’e nia apela ba governu atu tau atensaun ba problema sira-ne’e, hodi servisu hamutuk ho prezidente Autoridade Munisipiu sira, ho lider setorais sira, hodi kria enkontru, atu oinsá bele tranzmite informasaun ba malu para oinsá atu bele suporta hadia programa merenda eskolár ba oin.