- Publika iha: 31 Dezembro 2023
Prezidente Repúblika José Ramos Horta husu Ministériu Edukasaun (ME) tenke realiza programa merenda eskolár ba estudante sira iha nivel pre-eskolár.
Nia dehan, merenda eskolár ne'e importante tebes ba estudante sira, tanba kontribui ba nutrisaun di’ak labarik nian, no aumenta númeru partisipasaun iha eskola.
"Ita husu governu liuhusi Ministériu Edukasaun tenke realiza mós merenda eskolár iha nivel pre-eskolár la’ós ba de’it ensinu báziku," PR Horta Husu.
Alende ne'e mós husu ba inan-aman sira tenke lori labarik sira hahu husi tinan 3-5 ba iha eskola pre-eskolársira, tanba pre-eskolár ne'e importante ba labarik sira hodi aprende nune'e mós fatin halimar ba sira.
“Ha’u rona labarik balun apa ama sira la lori ba eskola, pre- eskolár ne’e importante tebes, bainhira labarik iha tina 4 no 5 bele ba ona eskola hodi halimar, lee no seluk tan,” dehan Prezidente Repúblika.
Iha fatin hanesan, Ministra Edukasaun Dulce de Jesus Soares dehan, Prezidente tau importansia bo’ot tebe-tebes ba edukasaun husi kedas labarik tinan 3 ba oin.
"Governu nafatin esforsu hodi realiza rekomendasaun sira husi Prezidente ba dezenvolvimentu edukasaun no abilidade estudante sira-nian hahu husi nivel pre-eskolár to'o sekundáriu liuhusi programa hotu ne’ebé mak governu iha liu-liu hanesan merenda eskolár desportu no seluk tan," nia dehan.
Nia dehan, kona-ba realiza merenda eskolár iha nivel pre-eskolár ne'e Ministériu sei koopera ho parseru nasionál no internasionál sira hodi identifika menu sira ne’ebé merese hodi implementa merenda eskolár ba labarik idade tinan 3-5.
"Ita rekoñese katak durante ne'e merenda eskolár implementa de’it ba estudante ensinu báziku sira primeiru to'o treseiru síklu deit," Ministra Edukasaun Soares dehan.
Tanba nia dehan, rekomendasaun hotu governu simu no sei esforsu, nune'e bele implementa programa merenda eskolár hahu husi pre-eskolár.