UNICEF Apoiu Formasaun Ba Profesór Pre-Eskolár no Ensinu Báziku

Governu liuhusi Ministériu Edukasaun (ME) husu UNICEF apoiu formasaun ba profesór pre-eskolár no ensinu báziku iha teritóriu laran tomak atu investe ba edukasaun ne’ebé kualidade husi baze.

Ministra Edukasaun, Dulce de Jesus Soares, dehan UNICEF nu’udar parseru nune’e mós péritu importante iha área aprendizajen nian no sira iha koñesimentu di’ak oinsa kona-ba tranzmite siénsia ne’ebé di’ak ba estudante sira.

“Ita husu UNICEF atu apoiu formasaun ba profesór sira iha nivel pre-eskolar nune’e mós ensinu báziku, atu bele prepara estudante sira fundasaun ne’ebé diak, nune’e ba ensinu sekundariu mos estudante sira prepaardu ona.

Durante ne’e ita apoiu formasaun ba profesór pre-eskolar nune’e mos ensinu báziku maibé ita hakarak husu tulun husi parseiru sira atu bele tranforma maneira hanoin ne’ebé mais modernu,” nia dehan.

Nia dehan, UNICEF parseria ho ME nian kuaze tinan naruk liu-liu kona-ba material eskolár, merenda eskolár, bee moos ba eskola sira, no infarestrutura eskolár.

Entretantu, Reprezentante UNICEF iha Timor-Leste, Mitsu Uemura, hatete dezenvolvimentu setór edukasaun sai progarama prioridade ba UNICEF iha Timor-Leste, tanba ne’e UNICEF sei apoiu ho kbiit tomak ne’ebé iha, hodi halo mudansa ba dezenvolvimentu edukasaun iha Timor-Leste.

“Durante ne’e ita parseria ne’e la’o di’ak tebes ita konsegue rezolve ona probelma balun ne’ebé edukasaun enfrenta hanesan apoiu livru ba ensinu báziku sira nune’e mós apoiu livru dezeñu no brinkedus ba eskola pre-eskolár kuaze 175 iha tetitóriu laran,” nia dehan.

Kona-ba formasaun ensinu ba profesór pre-eskolár no ensinu báziku ne’e tau ona iha planu, no UNICEF sei esforsu makas atu realiza iha tempu badak.