- Publika iha: 27 Agosto 2023
Ministériu Ensinu Superiór Siénsia no Kultura (MESK) realiza sorumutu ho Konsellu Reitór hodi husu membru sira-nian hanoin kona-ba oinsá hadia kualidade ensinu superiór nian iha futuru.
Ministro MESCK, José Honório Jerónimo, dehan instituisaun ensinu superiór iha Timor-Leste hamutuk 19 no governu presiza hadia sira-nia kualidade atu sira bele prepara rekursu di’ak hodi dezelvolve nasaun.
"Ita husu membru konsellu reitór sira-nia hanoin atu nune'e governu bele investe ho di’ak iha kualidade, tanba reitór sira mak hatene liu fallansu durante ne'e," nia dehan.
Nia dehan, ideia husi Konselho Reitór importante tebes hodi hadia dezelvolvimentu ensinu superior iha Timor-Leste.
"Ideia husi reitores sira, ita konsidera hotu hodi hadia kualidade ensinu superior," Ministro Jerónimo dehan iha Novu-Turismu.
Nia dehan, hanoin sira ne’ebé mak Konsello Reitores sira iha mak, fasilita formasaun ba dosente, apoiu ekipamentu ba instituisaun ensinu superior sira, nune'e mos hadia kurikulu nasional.
Entretantu, Reitór Dili Institute of Tecnology (DIT), Salustiano dos Reis Piadade, dehan DIT sempre kopera hamutuk ho MESK ho kualker polítika ne’ebé mak iha, hodi halo dezenvolvimentu ba kualidade ensino superior iha rai laran.
"Ami husi DIT liuhusi enkontru ne'e ami rekomenda ba MESSK tenke tau prioridade ba formasaun dosente ensinu superiór privadu sira, nune'e mós oferese bolsu estudu ba dosente sira, tantu iha rai-liur no rai-laran," nia salienta.
Tanba ne'e nia dehan, atu hadia kualidade ensinu superiór dosente sira presiza aumenta sira-nia kapasidade iha área hotu atu bele transmite siénsia ba estudante sira ho kualidade hodi bele prepara ba futuru.