- Publika iha: 17 Novembro 2017
Universidade Dili (UNDIL) konsege haruka ona dosente nain hat (4) hodi ba hasai estudu mestradu nian iha nasaun Portugal, kompostu husi feto rua no mane rua iha sira ida-idak nia area spesifiku ne’ebe iha.
Reitor UNDIL, Estevao da Costa Belo hateten dosente nain hat ne’ebe ba foti mestradu iha Portugal iha tinan 2014-2016 hamutuk feto rua mane rua, sira ba foti mestradu iha area spesifiku ida-idak .
”Sira nain hat ne’ebe hala’o sira nia estudu ne’e tinan rua ho balun, sira foti area spesifiku sira hanesan siencia ekonomia, saude, teknika no politika iha Universidade Aveiro Portugal,” nia hateten, iha Dili.
Husi nain hat ne’e, nia dehan nain ida fila tiha ona e nia foti iha area tekniku nian, enkuantu nain tolu seluk sei hotu iha fulan Novembru tinan ne’e.
Portantu, nia dehan subsidiu ne’e suporta husi govenru liu husi Ministeriu da Edukasuan (ME), entaun universidade uza balun haruka sira nia dosente ba hasai estudu iha rai liur hodi hasa’e sira nia kualidade do ensinar.
Entretantu, Diretor Jeral Ministeriu da Edukasaun Antoninho Pires hateten ministeriu la fo bolsu estudu direitamente ba dosente universitario privado sira, maibe aloka deit osan ba iha instituisaun depois mak sira eskolha sira nia dosente ba foti mestradu iha rai liur.
“Ami provide deit orsamentu e husi ministeriu orienta katak osan ne’e atu fo formasaun ba dosente sira,” DJ Pires hateten.
Kona ba numeru dosente ne’ebe sira haruka ba hasai estudu iha rai liur, nia dehan ne’e so kada universidade mak hatene sira nia dosente hodi ba foti iha area saida.
Kona ba subsidiu ne’ebe ME fob a universidade privadu sira ne’e, nia dehan la hanesan.
“Ezemplu, hanesan UNPAZ hetan $200 mil, osan ne’e bele uza ba parte tolu mak sosa ekipamentus ba hanorin nian, formasaun lingua Portugues ba dosente sira no bolsu estudo ba dosentes,” nia hateten.
Subsidiu ne’e, nia dehan ministeriu fo ba universidade privadu hirak ne’ebe hetan ona akreditasuan husi governu. “Iha tinan kotuk hamutuk 12 mak hetan akreditasun, agora sa’e ba 17 ona mak akreditadu,” nia hateten.
Iha sorin seluk Sekretario Nasional rede edukasaun Timor –Leste Coalition for Education (TLCE), Jose Monteiro hateten kada tinan ministerio fo subsidiu ba sira hodi ba hasai mestradu no lisensiatura iha rai liur, nune’e fila mai hanorin ho kualidade ne’ebe diak.
“Ba oin, Ministeriu Edukasaun tenke iha kriterio ba politika edukasaun, tenke rigorozu atu bele kontribui, sela’e sei la muda buat ida no sei nafatin gasta osan deit e ikus mai laiha rezultadu ba kualidade edukasaun iha rai laran,” nia dehan.