- Publika iha: 17 Novembro 2017
Komandante Polisia Munisipiu Dili, Superintedente Asistente Euclides Belo hateten estudante finalista nain rua husi eskola Sekundaria 4 de Setembru tuir ezame nasional iha deit eskuadra Polisia Munisipiu Dili, tanba ho razaun seguransa ba sira nia aan.
Nia hateten, estudante nain rua ne’e tuir ezame iha eskuadra polisia nian tanba sira iha problema pesoal ho kolega eskola no joven sira, ida ne’e mak halo sira la seguru tuir ezame iha eskola.
“Problema ho joven balun ne’ebe relasiona husi akontesementu kazu Taibesi nian ne’ebe sira sente la seguru atu tuir ezame,” Komandante Belo hateten, iha Dili.
Tanba ne’e, nia hateten Diretor da Eskola no Diretor da Edukasaun Munisipiu Dili e mos profesores halo kontaktu ho polisia, atu sira nain rua hela iha eskuadra polisia durante ezame nasional ho lokal hotu mak foin fila.
“Ida ne’e ami nia knar, asegura seguransa ba ema hotu e ami fasilita sira nain rua hela iha ami nia eskuadra Vera Cruz, toba iha ne’e, han mos iha ne’e, ezame mos ami prepara kadera meza no sira ezame iha kuartu ida,” Komandante Belo hatetn.
Kona ba pengawas no regulamentu ezame nasional, nia dehan tuir regulamentu no oras eskola nian ho pengawas mos husi professor sira husi eskola, disiplinha ezame nia la’o tuir nafatin regras eskola nian.
Entretantu Xefe Gestaun Apoio Tekniko (GAT), Sergio A. da Cruz hateten estudante nain rua ne’ebe tuir ezame iha eskuadra polisia ne’e atu bele asegura seguransa ba sira nia aan ho diak.
“Tuir informasaun ne’ebe ami rona no sira fo hatene mai ami, katak sira iha ameasa husi joven balun, maibe ameasa ho tipu saida ami seidauk hatene los kona ba ida ne’e,” nia hateten.
Nudar professor, nia dehan tenke hanoin mos estudantes nia future tanba future nasuan ida ne’e iha joven sira nia liman, entaun presiza asegura seguransa ba sira bainhira sira iha situasuan ameasa nia laran.
“Ezame nasional ne’e mak desidi sira nia destinu durante sira aprende iha tinan tolu nia laran, tanba esforsu aan tenke tuir ezame ne’e,” nia dehan.