- Publika iha: 31 Agosto 2017
Tuir observasaun husi rede edukasaun Timor-Leste Coalition for Education (TLCE) ba seitor edukasuan durante tina lima nia laran, nota katak setor edukasuan iha progresu diak intermus kresimentu numeru estudantes, profesores inklui harii eskola foun sira iha rai laran.
Jerente Programa TLCE, Matias do Santos hateten total eskola publiku husi ensino pre-eskolar, ensino baziku to’o universidade hamutuk 391611 mak eziste iha teritorio tomak no total profesores iha 13945.
Alende ne’e, nia dehan TLCE mos apresia ho programa bolsu estudu ne’ebe oferese ba Timor oan sira ba hasai kursu iha area oi-oin iha rai liur.
“TLCE nia observasaun, katak dezenvolvimentu edukasaun la’o, maibe barak liu mak sei hela iha kotuk, liu –liu infra-estrukturas, eskola barak mak seidauk diak,” nia hateten, iha nia knar fatin Kaikoli, Dili.
Nia informa, monitorizasaun TLCE haree iha eskola balun ne’ebe vulneravel tebes liu –liu kondisaun fiziku hanesan eskola nia airin sira kotu hotu ona.
“Ita espera, governu foun mai labele la’o ho kompromisio deit maibe presiza hatudu asaun hodi responde ba iha problemas ne’ebe eskola hasoru,” nia esperansa.
Nia mos, sujere ba governu foun mai atu kontinua buat ne’ebe governu anterior sira seidauk halo no finaliza ida ne’ebe lakonsege remata hodi asegura edukasaun ne’ebe ho kualidade ba futuru Timor nian.
Iha parte seluk, estudante Nivio Baptista husu governante sira atu tau matan diak liu tan ba iha eskolas, liu –liu kria infra-estrukturas ne’ebe adekuadu atu sira bele tuir prosesu aprendizajen ho diak no seguru.
“Ami (estudantes) nia hakarak mak tenke hadia kondisaun eskola, hanesan haris fatin, bee moos no seluk tan,” nia husu.