- Publika iha: 21 Novembro 2017
Fulan sia ona kompania abandona projetu konstrusaun ba edifisio foun Banku Nasional de Sangue.
Xefe Unidade Banku Nasional de Sangue, Gilberto Madeira hateten unidade banku de sangue presiza tebes espasu ne’e hodi hala’o servisu atendimentu publiku liu –liu transfusaun ran nian, tanba espasu ne’ebe sira utilize agora klo’ot.
Nia dehan, durante ne’e sira uza hela espasu ki’ik hodi fo atendimentu tanba ne’e sala registu no doasaun hamutuk deit fatin ida, nune’e mos sira laiha sala atu halo akonselamentu ba familia pasiente ne’ebe identifika hetan moras hodi asegura privasidade ema nian.
“Ami preokupa tanba konstrusaun ne’e paradu (lalao) besik tinan ida ona, ami lahatene tanba sa no ami hato’o ona kestaun ne’e ba iha parte ministerio saude, maibe nafatin laiha rezultado,” nia hateten iha servisu fatin Bidau, Dili.
Nia hateten, edfisio ne’e nesesario tebes ba iha servisu banku de sangue nian tanba ne’e husu kompania atu aselera lalais obra ida ne’e.
Tuir informasaun iha kuadro hatudu, obra ne’e hahu iha loron 18 fulan Julho 2016 no remata iha loron 17 fulan Janeiro tinan 2017, maibe to’o ona fin do ano mos projetu ne’e seidauk hatudu nia progressu diak.
Enkuantu, total orsamentu ba iha konstrusaun edifisio foun ne’e hamutuk $259,063.75.
Iha parte seluk, Diretor Nasional Aprovizionamentu, Logistika e Patrimonio Ministerio Saude, Francisco Borges hateten responsabilidade projetu ne’e mak Agensia Dezenvolvimentu Nasional (ADN) no ministerio supervision, e sira hato’o ona problema ne’e ba iha kompania no ADN.
Nia dehan, liu husi enkontru ne’ebe sira hala’o ho kompania katak obra ne’e lala’o tanba kompania sei halo analiza ba iha besi ne’ebe atu utilize halo kuda –kuda.
“Ami husu ona ba kompania atu labele hein deit analiza ida ne’e, maibe hahu halo ona buat seluk hanesan reboka no tau janela sira,” nia sujere.
Nia garantia, obra ne’e sei hahu fila fali iha tempu badak tanba rezultado analiza iha ona AND, hein deit aprovasaun (konkordansia) ba utilizasaun material.
Kona ba konstrusaun la tuir deadline ne’ebe iha, nia dehan normalmente iha sansaun, maibe ida ne’e kompetensia ADN nian.