- Publika iha: 29 Agosto 2017
Haris fatin publiku iha Largo Lecidere ho Palacio Governu nia oin hetan estragus hotu e alende ne’e bee mos laiha, tanba ne’e komunidade apela ba governu atu toma atensaun ba fatin publiku hirak ne’e.
Xefe Departemento Saneamento no Drenagen Dili, Juliao de Jesus hateten haris fatin publiku hirak ne’e aat tanba komunidade sira la kuidadu.
“Haris publiku hirak ne’e parte saneamentu baziku nian, ne’e Ministeriu Obras Publiku, Transporte no Komunikasuan nia okos, sira nia reponsabilidade,” nia hateten, iha Dili.
Nia informa, tuir politika nasional saneamentu baziku nian, kada ministeriu ida-ida fahe responsabilidade tuir saida mak tau ona iha politika ida ne’e.
Ne’ebe, kona ba responsabilidade lavandaria publiku iha Lecidere no Largo ne’ebe hetan estragus, nia dehan tanba falta koordenasuan entre autoridade ne’ebe mak iha kompetensia ba asuntu ne’e.
Tuir nia, antes harii presiza uluk esplika ba komunidade sira, nune’e sira bele kuidadu no labele estraga hodi dura to’o tinan barak.
Iha parte seluk Agustino nudar negosiante ne’ebe lor-loron fa’an nia sasan iha fatin ne’eba, husu ba governu atu tau matan ba haris fatin publiku rua ne’e.
“Ami haree, haris fatin hirak ne’e nakonu ho foer, ita ba la’o besik deit mos dois los, tanba bee laiha,” nia hateten.
Enkuantu, Domingos Ximenes nudar vizitante jardin Largo, Lecidere ne’ebe sempre ba tuur iha fatin ne’eba sente ladun furak, tanba haris fatin hirak ne’e iis los, ida ne’e fo imajen ladiak ba ema estranjeirus ne’ebe mai vizita Timor.
“Komunidade balun mai ho kondisaun lanu, bainhira iha tempu kalan sira ba soe liur bo’ot ga ki’ik tiha, depois sira estraga tiha haris fatin ne’e,” nia hateten.
Alende ne’e, nia dehan tanba governu mos ladun tau matan ba harisfatin publiku hirak ne’e, bee laiha maibe governu husik deit.