Numeru Dezempregu Kada Tinan Sa’e

Prezidente Konselho Nasional Joventude Timor-Leste (CNJTL) Maria Dadi Magno hateten numeru dezempregu iha rai laran kada tinan sa’e maka’as, tanba kada tinan numeru estudantes akaba iha ensino sekundariu barak mos.

Nia hateten, husi numeru hirak ne’ebe akaba estudu, balun mak kontinua sira nia estudu iha nivel universidade no balun mos la’e.
“Kada tinan numeru dezempregu sa’e to’o 15,000-20,000, tanba kampu de servisu laiha,” Prezidente CNJTL Magno hateten, iha Dili.
Iha parte ida, nia kontente tanba numeru estudantes akaba estudu husi ensino sekundariu barak, maibe triste tanba sira ne’ebe la kontinua estudu sai dezempregu.
“Iha kuantidade ita kontente, maibe iha kualidade ita triste, ita bele halo estimasaun 7,000 deit mak kontinua sira nia eskola, balun hetan bolsu estudu tantu rai liur no rai laran,” nia hateten.
Tanba ne’e, nia dehan iha politika nasional joventude nian sei haree estrategia intervensuan ne’ebe diak hodi reduz tiha numeru dezempregu, liu-liu sira ne’ebe moris iha risku nia laran tau matan ba sira. “Sira ne’ebe iha abilidade maibe laiha ooportunidade oinsa mak bele tau matan ba sira,” nia dehan.
Iha parte seluk Manager Programa ONG Forum Tau Matan (FTM), Evaristo de Deus hateten sira haree liu ba joven sira iha area rural (dezempregu), kapasita sira kona ba lideransa nian, oinsa mak sai lider ne’ebe diak, koalia iha publiku, hasa’e sira nia abilidade nune’e bele compete iha merkadu trabalhu.
“Ita hatene dezempregu barak no tinan-tinan ita nia governu loke kampu trabalhu barak, e joven barak mak iha abilidade maibe sira moe atu kompete iha kampu trabalhu,” nia hateten.
Iha sorin seluk, Komunidade Filomena da Costa husu ba governu atu loke kampu servisu ba joventude sira, tanba barak mak ohin loron laiha servisu.
“Husu ba governu foun, tenke buka mekanizmu oinsa hodi redus dezempregu iha Timor, tanba joven iha Timor maioria dezempregu,” nia husu.