MTCI prende makina slot 20 husi komunidade Xineza

Ministerio Turismu Komersiu e Industria (MTCI) liu husi Inspesaun Jeral de Jogus, prende makina slot 20 husi komuninidade Xineza, tanba hala’o jogus illegal ne’ebe kontra dekretu lei numeru 6 /2009.

“Jogu ne’e bandu, e governu sei la autoriza, tanba ami sita makina slot 20 inklui makina machon 2 ne’ebe oras ne’e iha hela polisia hodi submete ba iha prosesu investigasaun,” hateten Inspektor Jeral de Jogus, Miguel Lobato, semana kotuku iha Mandarin, Dili.

Tuir nia, makina hirak ne’e prende husi komunidade Xineza sira ne’ebe hela iha Pantai Kelapa no Mandarin inklui makina ho tipu machon iha Loza Jacinto nia oin, iha semana kotuk.

Atu kontinua halo operasaun ba komunidade sira ne’ebe hala’o jogus illegal iha capital Dili, Inspesaun jeral de jogus sei kopera hamutuk ho polisia. “Ami sei koopera ho polisia atu halo operasaun ba fatin hirak ne’ebe ami identifika sira kontinua uza jogu slot mesin,”nia dehan.

Iha parte seluk, tuir komunidade Bebora-Mandarin, Antonio Verdial, katak, jogu ne’ebe mak la’os timor nian presiza prende, tanba jogu sira ne’e komunidade ladun kompriende.

“Hau hanoin, MTCI ho PNTL presiza kontrola jogu hirak ne’e, tanba iha ita nia rai seidauk hatene saida mak jogu slot mesin ne’e. Ne’e duni Governu persija taka jogu sira ne’e, atu nune’e labele serkula iha ita nia rai laran,” nia husu.