Lampu tranzitu komesa normal

Hafoin fulan hirak nia laran la funsiona, lampu tranzitu iha capital Dili komesa lakan hafoin hadia husi kompania SELDA.

“Agora dadauk ne’e lakan hotu ona, so iha Vila-verde edifisiu ministeriu publiku nia oin mak la lakan tanba sirkuitu wainhira kompania Montania Di’ak halo estrada la kordena ho ami to’o ikus hotu kedas,” hateten Staf Senior Trafic Light, Jose Eugenio C.da Silva iha Balide, Dili.

Tuir nia, durante ne’e, iha fatin tolu mak lampu tranzitu ladun lakan ho diak e restu lakan hotu ona “Orsida kalan ami hadia ikus tan iha Toko Baru husi ospital nian sa’e mai,” nia dehan.

Nia hatutan, lampu tranzitu ne’ebe oras ne’e lakan fali ona mak hanesan ANZ nian, Bemori, Stadium, Ministeriu Justisa nian, EDTL nian, Colmera inklui iha Delta.

Staf Jose hateten, orsamentu ne’ebé mak aloka hodi hadia ba lampu ne’e mai husi DNTT rasik halo manutensaun ninian .
“Total orsamentu ba manutensaun lampu hirak ne’e hamutuk $30.000, pagamentu sei halo depois de hadia remata no lampu lakan hotu,” nia hateten.

Durante lampu tranzitu la funsiona, iha asidente barak mak mosu inklui halo engrafamentu iha estrada.

“Agora dadauk ita hare lakan fali ona, so ke iha fatin balun sedauk lakan e espera katak bele on aminimiza kemacetan no asidente,”hateten Komandante Unidade Polisia Tranzitu, Antonio Soares.

Tuir nia, durante lampu tranzitu la funsiona, nia koloka nia membru sira tuir postu tranzitu ne’ebe fiksu iha capital laran. “maibe fatin balun ami la kobre tanba ami nia membru limitadu,”.

Alende ne’e tuir deputado Natalino dos Santos, husi bankada Congresu Nasional Rekonstrusan Timor-leste (CNRT), katak lampu tranjitu atu funsiona ho di’ak, depende ba eletrisidade tanba lampu tranzitu ne’e fornesementu husi eletrisidade.

“Tanba ne’e estadu no governu iha dever atu tau osan ba ida ne’e, karik tinan oin mai iha posibilidade tenke aumenta tan osan atu hare fó kondisaun masimu ba tarfiku para labele hetan asidenti barak,” nia sujere.